द्वन्द्वकालका अपराधीलाई कारबाही गर्ने हो भने शान्ति प्रक्रिया टुङ्गिँदैन : गोविन्दप्रसाद कोइराला | Sunrise Khabar

काठमाडौं । कानुन न्याय तथा संसदीय मामिला मन्त्री गोविन्दप्रसाद शर्मा कोइरालाले द्वन्द्वको बेलाका घटनाका अपराधीलाई कारबाही गर्ने हो भने शान्ति प्रक्रिया नै टुङ्गोमा नपुग्ने बताउनुभएको छ । मंगलबार प्रतिनिधि सभा बैठकमा बेपत्ता पारिएका व्यक्तिको छानबिन, सत्य निरूपण तथा मेलमिलाप आयोग संशोधन विधेयक २०७९ लाई प्रस्तुत गर्न अनुमति माग्ने प्रस्तावमाथि विरोध जनाउँदै सांसद् प्रेम सुवालले उठाउनुभएको प्रश्नको जवाफ दिँदै मन्त्री कोइरालाले द्वन्द्वको बेलमा भएका केही गम्भीर प्रकृतिका घटनालाई नमुनाको रूपमा लिएर जाने र अरू घटनालाई झिसमिस पार्ने अन्तर्राष्ट्रिय प्रचलन रहेको उहाँले सुनाउनुभयो । ‘केही गम्भीर प्रकृतिका घटनालाई ट्रायलको रूपमा लिएर जाने र अरू सबै कुरामा मेलमिलापमा जाने बारेमा संसार भरी नै आम सहमति छ’, उहाँले भन्नुभयो । द्वन्द्वकालका मानव अधिकार विरुद्धका घटनालाई पनि अन्य समयको जस्तै लिएर जाने हो भने शान्ति प्रक्रिया नै टुङ्गोमा नपुग्ने उहाँले दाबी गर्नुभयो । सामान्य मानवअधिकार उल्लङ्घनमा पनि न्यायिक प्रक्रिया जाने हो त्यो सङ्क्रमणकालीन न्याय नभएर फौज्दारी न्याय हुने उहाँको भनाइ छ । हिजो सशस्त्र संघर्ष किन भयो भन्ने कुरा संविधानमा नै लेखिएकोले अन्य कानुनमा त्यो कुरा लेखिरहनु नपर्ने उहाँले बताउनुभयो । सरकारले सङ्क्रमणकालीन न्यायको नाममा विभिन्न आयोग पालिरहन नसक्ने भएकोले शान्ति प्रक्रियालाई टुङ्ग्याउन यो विधेयक ल्याएको उहाँले बताउनुभयो ।

शेयर गर्नुहोस्: