काठमाडाैं । प्रतिनिधि सभा र प्रदेश सभाकाे कार्यकाल थप्नेसम्बन्धी विवादास्पद विधेयक भाेलि बस्ने प्रतिनिधि सभा बैठकबाट पारित गर्ने तयारी गरिएकाे छ ।
संघीय संसद् सचिवालयले साेमबार सार्वजनिक गरेकाे प्रतिनिधि सभाकाे सम्भावित कार्यसूचीमा साे विधेयकमाथि छलफल गरेर पारित गर्ने उल्लेख छ ।
भाेलि दिउँसो १ बजे बस्ने प्रतिनिधि सभा बैठकमा कानुनमन्त्री गोविन्द प्रसाद शर्मा (कोइराला)ले 'केही नेपाल ऐन संशोधन गर्ने विधेयक, २०७९ माथिको दफावार छलफल सदनमा गरियोस्' भन्ने प्रस्ताव प्रस्तुत गर्नुहुनेछ ।
त्यसपछि सो विधेयकमाथि प्राप्त संशोधनहरुलाई निर्णयार्थ प्रस्तुत गरिनेछ । त्यसपछि 'केही नेपाल ऐन संशोधन गर्ने विधेयक, २०७९ पारित गरियोस्' भन्ने प्रस्ताव प्रस्तुत गर्ने कार्यसूची रहेकाे संसद् सचिवालयले जनाएकाे छ ।
सरकारले सदनकाे कार्यकाल थप्ने विषयलाई साे विधेयकमा समेटेर ल्याएकाे हाे । संसद्को कार्यदल थप्नेसम्बन्धी विधेयकको प्रमुख प्रतिपक्षी नेकपा एमालेले विरोध गरेको छ । निर्वाचन आयोगले पनि साे विधेयमाथि आपत्ति जनाएकाे छ ।
