काठमाडाैं । प्रमुख प्रतिपक्षी नेकपा एमालेका सांसद् शेरबहादुर तामाङले प्रतिनिधि सभा र प्रदेश सभाकाे कार्यकाल थप्ने विधेयक खारेज गर्न माग गर्नुभएकाे छ ।
मंगलबार बसेकाे प्रतिनिधि सभा बैठकमा केही नेपाल ऐन संशोधन गर्ने विधेयकमाथि संशोधन प्रस्ताव पेस गर्ने क्रममा सांसद् तामाङले सदनकाे कार्यकाल थप्ने विधेयक स्वीकार्य नहुने बताउनुभयाे । लाेकतन्त्रमा लाेकले निर्णय गर्ने भन्दै उहाँले चुनावकाे प्रक्रिया अगाडि बढाएपछि कार्यकाल लम्बाउने कुरा सरासर गलत भएकाे बताउनुभयाे ।
कार्यकालसम्बन्धी विधेयक आफूहरूलाई स्वीकार्य नहुने र त्यसपछि उत्पन्न परिस्थितीको कानुनमन्त्रीले जिम्मेवारी लिनुपर्ने समेत सांसद् तामाङले बताउनुभयाे । जनतासँग जाेडिएका विषयमा खेलवाड नगर्न उहाँले सरकारकाे ध्यानाकर्षण गराउनुभयाे ।
निर्वाचन घोषणा भएपछि संसद् स्वतः कोमामा जानुपर्ने र अधिवेशन अन्त्यको घोषणा गर्नुपर्नेमा विभिन्न बहानामा यसको कार्यकाल लम्बाएर तलब भत्ता खान खाेज्नु आपत्तिजनक रहेकाे उहाँले बताउनुभयाे ।
तामाङले भन्नुभयाे - 'हामी जिम्मेवार प्रतिपक्ष मात्र होइन, याे संसद्को वाच टाइगर पनि हौं, कतै ननटाइगरहरुले लोकतन्त्रको इको सिष्टम बिगार्ला कि भनेर हेर्न बसेका छौँ,नत्र हामी यहाँबाट निस्कनुपर्ने हुनसक्छ,यस्ताे कुरालाई ख्यालख्यालकाे विषय बनाएर अर्को संसद् आएर बस्नेगरी भनेर एेन ल्याउन मिल्छ ? संसद् आज कोमामा गइसक्नु पर्ने हाे ? तर अनेक के-के पास गर्नुपर्ने हाे त्यहि भएर यस्ता कुरा ल्याइएकाे छ ।'
कार्यकालकाे विषय असोज २ भन्दा पर लाग्न नमिल्ने भन्दै उहाँले संसद्को कार्यकाल सम्बन्धी विधेयक फिर्ता लिन माग गर्नुभयाे ।
केही नेपाल ऐन संशोधन गर्ने विधेयकमा उल्लेखित सम्पत्ति शुद्धिकरणसम्बन्धी एेनमा भने आफूहरुकाे सहमति रहेकाे उहाँले बताउनुभयाे । एमाले सरकारले नै साे एेन अगाडि बढाउन खाेजेकाे सांसद् तामाङले स्मरण गराउनुभयाे ।
