काठमाडौं । प्रतिनिधि सभाका सांसदहरू हाजिर गर्दै हिँड्दै गरेपछि गणपूरक सङ्ख्या नपुग्दा बारम्बार बैठक स्थगित हुने गरेको छ । सांसदहरू हाजिर गर्दै टाप कस्दै गरेपछि प्रतिनिधि सभा बैठकमा विधेयक पास गर्न बारम्बार अड्चन आउने गरेको छ । त्यस्तै समस्या मंगलबारको प्रतिनिधि सभा बैठकमा पनि देखियो । ‘केही नेपाल ऐनलाई संशोधन गर्न बनेको विधेयक’ माथि राखिएको संशोधन प्रस्ताव पेश गर्ने बेला प्रतिनिधि सभामा गणपूरक सङ्ख्या पुगेन । सो प्रस्ताव सभामा निर्णयार्थ सभामुख अग्निप्रसाद सापकोटाले पेस गर्न लाग्दा सांसद् प्रेम सुवालले गणपूरक सङ्ख्या नपुग्ने भन्दै उपस्थित सांसदको गणना गर्न माग गर्नुभयो । त्यस पछि सभामुखले तीन मिनेट घण्टी बजाएर गन्न लगाउँदा आवश्यक सङ्ख्या पुगेन । गणपूरक सङ्ख्याको लागि कम्तीमा ६९ सांसद् चाहिनेमा जम्मा ५८ सांसद् मात्र उपस्थित देखियो । सङ्ख्या नपुगेपछि सापकोटाले बैठक १५ मिनेटका लागि बैठक स्थगित गर्नुभयो । त्यसो त प्रतिनिधि सभामा सांसदको गणपूरक सङ्ख्या नपुगेको यो पहिलो पटक होइन । यस अघि पनि गणपूरक सङ्ख्या नपुगेर पटक पटक बैठक स्थगित भएको छ । प्रतिनिधि सभा बैठक सञ्चालनको लागि राज्य कोषबाट दैनिक ठुलो रकम खर्च हुने गर्दछ । प्रतिनिधि सभा सदस्यले मासिक पाउने पारिश्रमिक बाहेक बैठक सञ्चालन भएको दिन बैठकमा उपस्थित भए बापत छुट्टै पारिश्रमिक पाउनुहुन्छ । बैठकमा गएर हाजिर गरेपछि उहाँहरूको बैठक भत्ता पक्का हुन्छ । त्यसैले बैठकमा जाने हाजिर गर्ने र आफ्नो काममा निस्कन प्रचलन बढ्दै गएको छ । सांसद्हरु बैठकमा बस्ने, अरूका कुरा सुन्ने, आफ्ना कुरा राख्ने र छलफलमा सहभागी हुने क्रम घट्दै गएको छ । प्रतिनिधि सभाको यही सदनमा गणपूरक सङ्ख्या नपुगेर पटक पटक बैठक स्थगित भइसकेको छ । सांसदहरूले संसद् बैठकलाई महत्व नदिनुलाई गैर जिम्मेवारी भन्नेकी लापरबाही भन्ने ? जनताका प्रतिनिधि जनताको विषयमा छलफल हुने थलोमा त्यही कामको लागि पठाएका सांसदहरू कानुन बनाउने र पास फेल गर्ने बेलामा समेत अनुपस्थित हुन्छन् भने त्यस्ता जनप्रतिनिधिबाट कति आस गर्न सकिएला ?
सांसदहरू हाजिर गर्दै, टाप कस्दै : विधेयक पास गर्न गणपूरक सङ्ख्याकै सकस
काठमाडौं । प्रतिनिधि सभाका सांसदहरू हाजिर गर्दै हिँड्दै गरेपछि गणपूरक सङ्ख्या नपुग्दा बारम्बार बैठक स्थगित हुने गरेको छ । सांसदहरू हाजिर गर्दै टाप...
SUNRISE KHABAR
1 min read
