काठमाडौं । नेपाली कांग्रेसका सांसद् गगन थापाले उम्मेदवार मनोनयन भएको मितिबाटै प्रतिनिधि सभा र प्रदेश सभाको कार्यकाल सकिने व्यवस्था गर्नुपर्ने बताउनुभएकाे छ ।
मंगलबार बसेकाे प्रतिनिधि सभा बैठकमा केही नेपाल ऐन संशोधन गर्ने विधेयक २०७९ माथिको दफावार छलफलमा भाग लिँदै सांसद् थापाले मनोनयन भएको मितिबाटै प्रतिनिधि सभा र प्रदेश सभाको कार्यकाल सकिनेगरी कानुनी व्यवस्था गर्नुपर्ने बताउनुभयाे ।
प्रतिनिधि सभा र प्रदेश सभाको कार्यकाल लम्ब्याउने भन्दा पनि सो चुनावका लागि उम्मेदवार मनोनयन गरेपछि सांसद् पद नरहने गरी आवश्यक व्यवस्था गर्न उहाँले सुझाव दिनुभयाे । 'यो अहिले प्रस्तुत भएको सन्दर्भमा हामी निर्वाचनपछि आउने संसद्ले लामो बहस, छलफल गर्ला, आवश्यक परे संविधान संशोधन पनि गर्ला, अहिलेको लागि भने भने माननीय मन्त्रीज्यूको ध्यानआकृष्ट गर्न चाहन्छुऔ हामी जुन मनोनयन गर्न गर्छौं, त्योसँगसँगै हाम्रो आफ्नो पद जान्छ, सांसद पद जान्छ र कार्यकालको गणना गर्ने सन्दर्भमा पनि हामीले अन्तिम मत परिणाम जुन प्रकाशन हुन्छ, त्यसको दिनबाट गणना हुनेगरी संशोधन भएर जाओस् भन्ने कुरा मैले मैले आफ्नो संशोधन राखेको छु'-थापाकाे भनाइ छ ।
पछिल्ला केही समय यता आएर सांसदहरू १-२ महिनाको पारिश्रमिकका लागि मरिहत्ते गर्छन् भन्ने गलत सन्देश बाहिर गएको भन्दै थापाले संसदलाई नै दाग लगाउने खालका सन्देशहरू प्रवाह हुन नदिन सत्तापक्ष र प्रतिपक्ष एक ठाउँ उभिनुपर्ने बताउनुभयाे ।
'कोही यहाँ पारिश्रमिक लिने पक्षमा छौं, कोही यहाँ नलिने पक्षमा छौं मानौं १-२ महिनाको तलबको लागि सांसद्हरु मरिहत्ते गरिरहेका भन्ने ढंगबाट यसलाई बाहिर बुझिएको छ-बुझाइएको छ, कतिपय सन्दर्भमा यो बुझ्दै गर्दाखेरी सरोकारवालाहरूलाई मात्रै लागेको होला दोष भन्ने कतिलाई लाग्ला पनि, तर कहिलेकाँही संसदको प्रतिष्ठाको लागि हामी एक ठाउँ उभिनुपर्छ, हामी उभिएनौं भनेदेखि त्यसको दाग हामी सबैलाई लाग्छ। यतातिर पनि हेक्का राखौं भन्ने लाग्छ मलाई'-थापाले भन्नुभयाे ।
