काठमाडाैं । नेकपा एमालेका प्रमुख सचेतक विशाल भट्टराईले सत्ता गठबन्धन सरकारले चुनावलाई प्रभावित पार्नेगरी कर्मचारी सरुवा गरिरहेकाे बताउनुभएकाे छ ।
बुधबार बसेकाे प्रतिनिधि सभा बैठककाे विशेष समयमा बाेल्दै सांसद् भट्टराईले मंसिर ४ गते हुने प्रतिनिधि सभा र प्रदेश सभा चुनावलाई प्रभावित गर्ने गरी सरकारले कर्मचारी सरुवा गर्ने काम गरिरहेको बताउनुभयाे । सरकारले मनलाग्दी तरिकाले कर्मचारी सरुवा गरिरहेकाे भन्दै उहाँले आपत्ति जनाउनुभयाे ।
चुनावलाई प्रभावित पार्ने गरी सरकारले राजनीतिक आस्थाको आधारमा प्रमुख जिल्ला अधिकारी र प्रहरी प्रमुखहरू जिल्ला-जिल्लामा खटाउने काम गरिरहेको सांसद् भट्टराईले बताउनुभयाे । उहाँले भन्नुभयाे - 'चुनावलाई प्रभावित गर्ने गरी आस्थाका आधारमा आफ्ना मान्छेहरू छानीछानी जिल्ला-जिल्लामा प्रहरी प्रमुख र जिल्ला प्रशासन कार्यालयको प्रमुख अधिकारीको रूपमा पठाउने काम भइरहेको छ, स्थानीय तहमा प्रमुख प्रशासकीय अधिकृत त्यसैगरी खटाउने काम गरिएकाे छ,याे तरिकाले निर्वाचनालाई प्रभावित गर्नेगरी आफ्ना मान्छे छानी छानी लैजाने काम गरिएकाे छ ।'
रिक्त भएकाे ठाउँमा निर्वाचन आयाेगले पठाउँदा आफूहरुकाे आपत्ति नरहेकाे पनि उहाँले प्रष्ट पार्नुभयाे । 'रिक्त भएकाे ठाउँमा आयाेगकाे अनुमतिले पठाउँदा हामीलाई कुनै आपत्ति छैन,तर रिक्त भएका ठाउँमा हाेइन सरुवा गरीगरी अलिकति पनि हामीलाई सघाउँदैन भन्ने लागेकाे छ भने त्यसमा ठ्याक्कै सघाउने मिल्ने भए झण्डै बाेक्ने मान्छेहरुलाई पठाउने काम अहिलेकाे सरकारले गरिरहेकाे छ ।'
वैशाख ३० गते सम्पन्न स्थानीय तह चुनावमा २०४८ पछिकै प्रहरीप्रशासन हस्तक्षेप गरेकाे भन्दै उहाँले आम चुनावमा पनि सरकारले त्यसाे गर्न खाेजिरहेकाे बताउनुभयाे । नेकपा एमाले सरकारमा छँदा चुनावकाे पूर्वसन्ध्यामा यस्ताे खालको हर्कतहरू नगरेकाे भट्टराईले स्मरण गराउनुभयाे ।तत्काल त्यो काम नरोकिए एमालेले कडा प्रतिवाद गर्ने चेतावनी दिनुभयाे ।
'हामी सरकारकाे याे कामकाे कडा रूपमा प्रतिवाद गर्न चाहन्छौँ, सरुवा भएर जानेहरूलाई भन्न चाहन्छौँ- नेकपा एमाले चुप लागेर बस्दैन, आस्थाको आधारमा कुनै पनि खालको अन्याय गर्न थालियो भने वा मतलाई प्रभावित गर्न थालियो भने हामी कुनै पनि हालतमा त्यसलाई प्रतिवाद गर्नेछौँ भन्ने म चेतावनीका साथ भन्न चाहन्छु ।'
सबैखाले सरुवा बन्द गरेर हिजाेआज गरिएका सरुवा बन्द गर्न पनि उहाँले सरकारकाे ध्यानाकर्षण गराउनुभयाे ।
प्रमुख सचेतक भट्टराईले हास्य कलाकार अपूर्वक्षितिज सिंहलाई आफ्नो कला प्रस्तुत गरेबापत १० दिनदेखि हिरासतमा राखेकोमा आपत्ति जनाउँदै तत्काल रिहाइ गर्न पनि सरकारसँग माग गर्नुभयाे । मन्त्रीले कर्के आखाँले हेर्दा सुरक्षा गार्ड थुनिने अवस्था सृजना गरेकाे भन्दै उहाँले आपत्ति जनाउनुभयाे ।
