काठमाडौं । नेपाल मजदुर किसान पार्टीका सांसद प्रेम सुवालले डेंगु राेग नियन्त्रणका लागि सरकार गम्भीर नभएकाे बताउनुभएकाे छ ।
बुधबार बसेकाे प्रतिनिधि सभा बैठककाे विशेष समयमा बाेल्दै सांसद् सुवालले महामारीको रुपमा फैलिएको डेंगुको अवस्थाबारे सदनलाई जानकारी गराउन सरकारसँग माग गर्नुभयाे ।
डेंगुका कारण जनताले ज्यान गुमाइरहँदा पनि स्वास्थ्य तथा जनसंख्या मन्त्रालयले नियन्त्रणका लागि प्रभावकारी कदम चाल्न नसकेकाे उहाँले बताउनुभयाे । डेंगु नियन्त्रणका लागि स्वास्थ्य तथा जनसंख्यामन्त्री भवानीप्रसाद खापुङले नेतृत्वदायी भूमिका निर्वाह गर्न नसक्नुभएकाे पनि बताउनुभयाे ।
सांसद् सुवालले स्वास्थ्य तथा जनसंख्या मन्त्रालयलाई आवश्यक बजेटको व्यवस्था गरे पनि त्यसको सदुपयोग गर्न नसकेकाे पनि बताउनुभयाे ।
उहाँले भन्नुभयाे - 'कोरोनापछि डेंगु रोगले जनता एकदमै पीडित छन्, अस्पतालहरुमा शैयाको अभाव छ, स्वास्थ्य मन्त्रीज्यू देशकाे स्थिति के छ ? डेंगु महामारीका रुपमा फैलिँदैछ, स्वास्थ्य मन्त्रालय नभएकोजस्तो भयो, स्वास्थ्य मन्त्रालयका लागि त बजेट धेरै छुट्टयाइएकै हो, तर स्वास्थ्य मन्त्रालयको प्रभावकारिता देखिएन, मन्त्रीज्यूको नेतृत्व देखिएन, यसबारे सदनमा मन्त्रीज्यूलाई तत्काल बोल्ने व्यवस्थाका लागि म सभामुख महोदयसँग आग्रह गर्न चाहन्छु ।'
सरसफाइ अभियान समेत मन्त्रालयले चलाउन नसकेकाे भन्दै सांसद् सुवालले भन्नुभयाे - 'जनताको मृत्यु भइरहेको छ डेंगुका कारण, सामान्य रोग हो याे, सरसफाई भइदिएको खण्डमा यो रोगबाट जनताको मृत्यु हुँदैन, तर सरसफाइ पनि स्वास्थ्य मन्त्रालयले गर्न नसकेकाे देखियो ।'
खाेप विश्वविद्यालयसम्बन्धी विधेयककाे अवस्थाबारे जानकारी दिन सरकारकाे ध्यानाकर्षण गराउनुभयाे । सारा पार्टीले समाजवादी भनिरहेका भएपनि समाजवाद खै भन्ने स्थिति आएकाे सांसद् सुवालले बताउनुभयाे । नागरिकता विधेयक खारेज गर्न पनि सांसद् सुवालले माग गर्नुभयाे । स्थानीय चुनावमा २ सय बढी ठेकेदारलाई उठाइएकाे भन्दै उहाँले आपत्ति जनाउनुभयाे ।
