काठमाडाैं । संसदीय समितिले दशैं, तिहार, छठजस्ता पर्वका लागि देशभर सुपथ मूल्य पसलको व्यवस्था मिलाउन सरकारलाई निर्देशन दिएको छ ।
मंगलबा सिंहदरबारमा बसेकाे राष्ट्रिय सभाको दीगो विकास तथा सुशासन समितिको बैठकले देशभर सुपथ मूल्य पसलको आवश्यक व्यवस्था मिलाउन सरकारलाई निर्देशन दिएको हो ।
बैठकले चाडपर्वको बेला बजार अनुगमनको कामलाई थप प्रभावकारी बनाउन पनि सरकारलाई निर्देशन दिएकाे समिति सभापति प्रकाश पन्थले जानकारी दिनुभयाे ।
बैठकले दशैंका लागि घर जाने यात्रहरूका लागि सहज ढंगले टिकट पाउने गरी काउन्टरहरूको आवश्यक व्यवस्था गर्न,सवारी साधनको भाडादर जथाभाबी लिन नपाउने गरी अनुगमनको काममा कडाइ गर्न भौतिक पूर्वाधार तथा यातायात मन्त्रालयलाई पनि निर्देशन दिएको छ ।
समितिले शान्ति, सुरक्षाको आवश्यक व्यवस्था मिलाउन गृह मन्त्रालयलाई पनि निर्देशन दिएकाे उहाँले बताउनुभयाे । 'शान्ति, सुरक्षाको आवश्यक व्यवस्था मिलाउन र काला बजारी नियन्त्रणका लागि प्रभावकारी कदम चाल्न गृह मन्त्रालयलाई आवश्यक निर्देशन दिइएकाे छ'-सभापति पन्तले भन्नुभयाे ।
