काठमाडाैं । प्रदेश सभा नियमावली, २०७४ स्वीकार गर्ने प्रस्ताव प्रदेश-१ प्रदेश सभाबाट पारित भएकाे छ ।
आइतबार बसेकाे प्रदेश सभाकाे पहिलाे बैठकले प्रदेश सभा नियमावली २०७४ (पहिलो संशोधन समेत) लाई स्वीकार गरी साेही आधारमा सभाका काम कारबाहीलाई अगाडि बढाउने प्रस्ताव पारित गरेकाे हाे ।
नेपाली कांग्रेसका प्रदेश सांसद् भीम पराजुली प्रस्तावक र नेकपा एमालेका सांसद् लीलावल्लव अधिकारी समर्थक रहनुभएकाे साे प्रस्ताव सर्वसम्मतिले पारित भएकाे ज्येष्ठ गयानन्द मण्डल गनगाईंले घाेषणा गर्नुभयाे । प्रस्ताव पारित भएसँगै सभाकाे काम कारबाही अघि बढेकाे छ ।
बैठककाे सुरुमै गनगाईंले प्रदेश प्रमुख र्शुराम खापुङबाट प्राप्त अधिवेशन आह्वानसम्बन्धी पत्र वाचन गरेर सुनाउनुभएकाे थियाे ।
बैठकमा सरकारले २ वटा अध्यादेश पेस गरेकाे छ । आन्तरिक मामिला तथा कानुन मन्त्री केदार कार्कीले प्रदेश निजामती सेवाकाे गठन सञ्चालन र सेवाका शर्तका सम्बन्धमा बनेकाे 'निजामती सेवा अध्यादेश, २०७९' र केही प्रदेश ऐन संशोधन अध्यादेश, २०७९ पेस गर्नुभएकाे हाे । दुवै अध्यादेश प्रदेश प्रमुखले गत असोज ११ गते जारी गर्नुभएकाे थियाे ।
प्रदेश-१ मा नेकपा एमालेका ४०, कांग्रेसका २९, माओवादीका १३, राप्रपाका ६,एकीकृत समाजवादीका ४ र जसपाका १ जना सांसद् छन् । केन्द्रमा एमालेकाे पहलमा माओवादीले सरकारकाे नेतृत्व गरेकाले त्यसकाे प्रभाव प्रदेशमा पर्ने देखिन्छ ।
अहिलेकाे सत्ता गठबन्धनमा रहेकाे एमाले, माओवादी, राप्रपा र जसपा मिलेर प्रदेश-१ सरकार बनाउनेछन् । प्रदेश-१ मा सरकारकाे नेतृत्व एमालेले गर्ने बताइएकाे छ ।
