काठमाडौं । प्रतिनिधि सभामा प्रमुख प्रतिपक्षी दलका नेता शेरबहादुर देउवाले नेपाली कांग्रेसले जिम्मेवार प्रतिपक्षको भूमिका निर्वाह गर्ने बताउनुभएको छ ।
सोमबार प्रतिनिधि सभा बैठकमा बोल्दै देउवाले कांग्रेसले प्रतिनिधि सभामा रचनात्मक र जिम्मेवार प्रतिपक्षको भूमिका खेल्ने प्रष्ट पार्नुभयो । उहाँले प्रधानमन्त्री पुष्पकमल दाहाललाई सफलतापूर्वक काम गर्न शुभकामना दिनुभयो ।
देउवाले आफ्नो नेतृत्वमा बनेको गठबन्धन सरकारले देशको संविधान जोगाएको बताउनुभयो । देशमा समस्या आउँदा कांग्रेसले नेतृत्व गरेर ती समस्या समाधान गरेको उहाँले दाबी गर्नुभयो ।
गएको निर्वाचनमा नेपाली कांग्रेसलाई सबैभन्दा ठुलो दल बनाइदिएको भन्दै उहाँले मतदातालाई धन्यवाद दिनुभयो ।
