काठमाडाैं । नेकपा एमालेका अध्यक्ष एवं संसदीय दलका नेता केपी शर्मा ओलीले नेपाली कांग्रेसले लाेकतन्त्रकाे नयाँ भाष्य स्थापना गरेकाे बताउनुभएकाे छ ।
मंगलबार बसेकाे प्रतिनिधि सभाकाे बैठकमा प्रधानमन्त्री पुष्पकमल दाहाल प्रचण्डले पेस गर्नुभएकाे विश्वासकाे मतसम्बन्धी प्रस्तावमाथि छलफलमा भाग लिँदै उहाँले सरकारलाई समर्थन गरेर कांग्रेसले नयाँ इतिहास बनाएकाे बताउनुभयाे ।
सरकारलाई समर्थन गरेकाे भन्दै उहाँले कांग्रेस सभापति शेरबहादुर देउवालाई धन्यवाद दिनुभयाे । उहाँले भन्नुभयाे - 'प्रतिपक्षका नेतालाई पनि धन्यवाद उहाँले सकारकाे समर्थन गर्नुभएकाे छ, कांग्रेसले प्रतिपक्षकाे हाेइन एउटा सहकार्यकाे कुरा राखेकाे छ, डेमाेक्रेसीकाे एउटा नयाँ भाष्य डेभ्लप गर्नुभएकाे छ, यसबारे देशमा पनि छलफल हाेला, इतिहासमा पनि छलफल हाेला ।'
कांग्रेसकाे समर्थन जालझेल नभए स्वागतयाेग्य रहेकाे पनि अध्यक्ष ओलीले बताउनुभयाे । उहाँले भन्नुभयाे - 'कांग्रेसको समर्थन सदासयताबाहेक अरु कुरा छैन भने, कुनै जाल होइन भने यो, ढोक्सा होइन भने स्वागतयोग्य छ, ढोक्सा हो भने माछा नभएको खोलामा फ्याकेको जस्तै हुनेछ ।'
कांग्रेसले पनि समर्थन गरिसकेकाे अवस्थामा बाँकी दल र स्वतन्त्र सांसद्लाई पनि सरकारलाई समर्थन गर्न अध्यक्ष ओलीले आग्रह गर्नुभयाे ।
प्रधानमन्त्री प्रचण्डले अगाडि सार्नुभएका सरकारका नीति तथा कार्यक्रमकाे खुलेर प्रशंसा गर्नुभयाे । प्रधानमन्त्रीले स्पष्ट प्रतिष्पर्धा अगाडि सार्नुभएकाे भन्दै उहाँले ती पूरा गर्न चुनाैती रहेकाे बताउनुभयाे ।
