काठमाडौं । प्रतिनिधि सभा सदस्य रेखा शर्माले विगतको कमजोरीको समीक्षा गर्दै विश्वासको मत मागेकोमा खुसी व्यक्त गर्नुभएको छ ।
मंगलबार प्रतिनिधि सभा बैठकमा बोल्दै शर्माले निषेधको राजनीति त्यागेर सहकार्यको राजनीति गर्ने कुरा प्रधानमन्त्रीले व्यक्त गर्नु सकारात्मक भएको बताउनुभयो । निषेधको राजनीति होइन देशलाई फेरी पनि सहकार्यको आवश्यकता छ भन्ने कुरालाई मनन गर्दै प्रमुख प्रतिपक्षी दल नेपाली कांग्रेसले विश्वासको मत दिने कुरा गर्नु निक्कै महत्पूर्ण भएको उहाँले बताउनुभयो ।
प्रधानमन्त्री पुष्पकमल दाहालको नेतृत्वमा फेरी राष्ट्रिय सहमति सहितको सरकार बनेको भन्दै उहाँले खुसी व्यक्त गर्नुभयो । यसबाट नेपाली जनतालाई आशावादी बनाएको उहाँले बताउनुभयो ।
यसलाई अगाडि बढाउनको लागि प्रधानमन्त्री सहित, नेपाल सरकार, राजनीतिक दल र सिङ्गो देश नै गम्भीर ढङ्गले लाग्नु पर्ने उहाँले बताउनुभयो । ‘संसद्को बनावटले नै निषेधको राजनीति होइन सहकार्यको माग गर्दछ’, उहाँले भन्नुभयो ।
प्रधानमन्त्रीको प्रतिबद्धता प्रति सबै दलहरू आभारी रहेको उहाँले बताउनुभयो । उहाँले सबै दल र स्वतन्त्र सांसदलाई समेत सरकारलाई समर्थन गर्न आग्रह गर्नुभयो । आजको दिन नेपालको इतिहासमा ऐतिहासिक दिन भएको पनि उहाँले बताउनुभयो ।
