काठमाडौं । प्रदेश १ का मुख्यमन्त्री हिक्मतकुमार कार्कीले प्रदेशको अधिकार प्राप्तिका लागि प्रदेश सभाका सबै दल एक ठाउँमा उभिनु पर्ने बताउनुभएको छ ।
मंगलबार प्रदेश सभा बैठकमा बोल्दै मुख्यमन्त्री कार्कीले प्रदेशको अधिकार प्राप्तिको लागि साझा लडाइँ जरुरी रहेको बताउनुभयो । प्रदेशको औचित्य पुष्टि गर्न पनि एकजुट हुन आवश्यक रहेको उहाँले बताउनुभयो । ‘हामीले अधिकार नपाउँदा काम गर्न सकिरहेका छैनौँ’, कार्कीले भन्नुभयो ।
संरचनाको अभाव हुँदा प्रदेशका मन्त्रालय विभिन्न ठाउँमा छरिएर रहेका उहाँले बताउनुभयो । यसले कार्यसम्पादनमा ढिलाइ भएको उहाँले प्रस्ट्याउनुभयो । प्रदेश सरकारका मन्त्रालय एकै ठाउँमा रहने गरी संरचना बनाउन आवश्यक रहेको उहाँले बताउनुभयो ।
प्रदेशको नामाकरणको काम त्यतिकै चुनौतीको रूपमा रहेको कार्कीले बताउनुभयो । यसको लागि पनि सबै दल एक ठाउँमा उभिनु पर्नेमा उहाँले जोड दिनुभयो ।
