काठमाडौं । प्रधानमन्त्री पुष्पकमल दाहाल प्रचण्डले प्रतिनिधि सभामा विश्वासको मत पाउनुभएको छ ।
मंगलबार प्रतिनिधि सभा बैठकमा प्रधानमन्त्रीले विश्वासको मत माग्नु भएको थियो । प्रतिनिधि सभामा उपस्थित कूल २ सय ७० सदस्य मध्ये २ सय ६८ जनाले दाहाललाई विश्वासको मत दिएका छन् ।
उहाँको विपक्षमा दुई मत परेको छ । कुनै पनि सदस्य मतदानको क्रममा तटस्थ बस्नु भएन ।
प्रधानमन्त्रीलाई राष्ट्रिय जनमोर्चाका सांसद् चित्रबहादुर केसी र नेपाल मजदुर किसान पार्टीका सांसद् प्रेम सुवालले मत दिनु भएन । बाँकी बैठकमा उपस्थित सबै पार्टी र स्वतन्त्र सांसदहरूले समेत उहाँलाई मत दिनुभयो ।
प्रतिनिधि सभामा जम्मा २ सय ७५ सदस्य छन् ।प्रधानमन्त्रीको लागि प्रतिनिधि सभामा कम्तीमा १ सय ३८ जना सांसदकाे समर्थन आवश्यक पर्दछ ।
सम्पन्न निर्वाचनमा प्रतिनिधि सभामा कुनै पनि राजनीति दलको स्पष्ट बहुमत नपुगेपछि माओवादी संसदीय दलका नेता प्रचण्ड संविधानको धारा ६८ को उपधारा २ अनुसार प्रधानमन्त्री बन्नु भएको थियो । उहाँले प्रधानमन्त्री नियुक्त भएको एक महिना भित्र विश्वासको मत लिनु पर्ने कानुनी प्रावधान अनुसार मंगलबार प्रतिनिधि सभा बैठकमा विश्वासको मत लिनुभएको हो ।
