काठमाडाैं । वाग्मती प्रदेश सभाकाे सभामुखका लागि सत्ता गठबन्धनबाट राष्ट्रिय प्रजातन्त्र पार्टी (राप्रपा) का महामन्त्री भुवन पाठकले उम्मेदवारी दिनुभएकाे छ ।
पाठकले संविधानको धारा १८२ एवं प्रदेश सभा नियमावली पहिलो संशोधन २०७४ को नियम ७ को उपनियम २ बमोजिम बिहीबार मनाेनयन दर्ता गराउनुभएकाे हाे । पाठकलाई नेकपा एमालेका सांसद् जगन्नाथ थपलियाले प्रस्ताव र माओवादी केन्द्रका युवराज दुलालले समर्थन गर्नुभएकाे छ ।
वाग्मतीकाे सभामुखका लागि नेपाली कांग्रेस र नेपाल मजदुर किसान पार्टी (नेमकिपा) ले पनि उम्मेदवारी दर्ता गराएका छन् । कांग्रेसबाट शिवराज अधिकारीले उम्मेदवारी दर्ता गराउनुभएकाे छ । उहाँलाई कांग्रेस सांसद् कुन्दनराज काफ्लेको प्रस्ताव र रामकृष्ण चित्रकारको समर्थन गर्नुभएकाे छ ।
नेमकिपाबाट सायजुले उम्मेदवारी दार्ता गराउनुभएको छ । सायजुको प्रस्तावकमा नेमकिपाका सांसद् सुरेन्द्र राज गोसाइँ र गीता काफ्ले समर्थक हुनुहुन्छ ।
आजै दिउँसो साढे २ देखि साढे ३ बजेसम्म मनोनय फिर्ताको समय तोकिएको प्रदेश सभा सचिवालयले जनाएकाे छ । प्रदेश सभा सचिवालयले आजै दिउँसो ४ बजे अन्तिम नामावली प्रकाशन गर्नेछ । पुस २९ गते बिहान ११ बजे मतदान गर्ने कार्यतालिका छ ।
नेपालको संविधानको धारा १८२ को उपधारा १ मा प्रदेश सभाको पहिलो बैठक सुरु भएकाे मितिले १५ दिनभित्र सभामुख छानिसक्नुपर्ने प्रावधान छ । वाग्मती प्रदेश सभाको दोस्रो कार्यकालको पहिलाे बैठक पुस १८ गते बसेको थियाे ।
११० सदस्यीय वाग्मती प्रदेश सभामा नेपाली कांग्रेसका ३७, नेकपा एमालेका २७, माओवादी केन्द्रका २१, राप्रपाका १३, एकीकृत समाजवादीका ७, नेमकिपाका ३ र हाम्रो नेपाली पार्टीका २ जना सांसद् छन् ।
