काठमाडौं । प्रतिनिधि सभा सदस्य विमलेन्द्र निधिले प्रतिनिधि सभा बैठकमा एमाले संसदीय दलका नेता केपी शर्मा ओलीले व्यक्त गर्नुभएको अभिव्यक्ति प्रति आपत्ति प्रकट गर्नुभएको छ ।
बिहीबार प्रतिनिधि सभा बैठकमा बोल्दै निधिले ओलीले प्रतिनिधि सभा विगठन गर्नु ठिक थियो भनी बारम्बार दिएको अभिव्यक्तिले प्रतिनिधि सभा फेरि विघटन हुनसक्छ भन्दै झस्काएको बताउनुभयो ।
नेपाली कांग्रेसले प्रधानमन्त्रीलाई बलियो बनाउन विश्वासको मत दिएको उहाँले बताउनुभयो । प्रधानमन्त्रीलाई विश्वासको मत दिए पनि काँग्रेस प्रतिपक्षमा नै रहेको उहाँले प्रष्ट पार्नुभयो ।
प्रधानमन्त्रीलाई विश्वासको मत दिँदा सत्ता पक्ष खुसी हुनु पर्नेमा दुःखी भएको भन्दै उहाँले आश्चर्य प्रकट गर्नुभयो । ‘आफूले प्रस्ताव गरेको प्रधानमन्त्रीलाई विपक्षीले मत दिँदा त खुसी व्यक्त गर्नु पर्ने हो, उहाँलाई दुःख लागेको छ, के भएको यो ?’, निधिले प्रश्न गर्नुभयो ।
प्रतिनिधि सभाको विघटन प्रतिगमन नै भएको उहाँले दाबी गर्नुभयो । यसमा एमाले अध्यक्षलाई अहिले पनि गल्ती बोध नभएको भन्दै निधिले चिन्ता व्यक्त गर्नुभयो ।
