काठमाडाैं । प्रतिनिधि सभाकाे उपसभामुखमा राष्ट्रिय स्वतन्त्र पार्टी (रास्वपा) की इन्दिरा राना निर्वाचित हुनुभएकाे छ ।
शनिबार बसेकाे प्रतिनिधि सभा बैठकबाट सत्ता गठबन्धनकी साझा उम्मेदवार राना उपभामुखमा निर्वाचित हुनुभएकाे हाे । नेपाली कांग्रेसकी मुक्ताकुमारी यादवलाई पराजित गर्दै राना उपसभामुखमा निर्वाचित हुनुभएकाे हाे ।
प्रतिनिधि सभा बैठकमा भएकाे मत विभाजनमा २ सय ६४ सांसद् मतदान सहभागीमा भएकामा रानालाई उपसभामुखमा निर्वाचित गरियाेस् भन्ने प्रस्तावकाे पक्षमा १ सय ६६, विपक्षमा ९७ मत र मत दिन्नँ भन्ने पक्षमा १ मत परेकाे सभामुख देवराज घिमिरेले घाेषणा गर्नुभयाे ।
साे संख्या प्रतिनिधि सभामा हाल कायम रहेका सांसद्काे बहुमत संख्या भएकाले इन्दिरा राना उपभामुखमा निर्वाचित हुनुभएकाे सभामुख घिमिरेले घाेषणा गर्नुभयाे । रानालाई सत्ता साझेदार दलसँगै ३ स्वतन्त्र सांसद्ले पनि मत दिएका छन् ।
उपसभामुखमा रानालाई निर्वाचित गरियाेस् भन्ने प्रस्तावमा बहुमत पुगेकाले मुक्ताकुमारी यादवलाई उपसभामुखमा निर्वाचित गरियाेस् भन्ने अर्काे प्रस्ताव निर्णयार्थ पेस गर्न नपर्ने सभामुख घिमिरेले जानकारी दिनुभयाे ।
रानाकाे प्रस्तावकमा रास्वपाकी सांसद् सोविता गौतम हुनुहुन्थ्याे । समर्थकमा नेकपा एमालेका कृष्णगोपाल श्रेष्ठ, माओवादी केन्द्रका नारायणी शर्मा र राष्ट्रिय प्रजातन्त्र पार्टी (राप्रपा)का राजेन्द्रप्रसाद लिङ्देन हुनुहुन्थ्याे ।
सामाजिक सेवामा फराकिलो परिचय बनाएर विश्वमाझ परिचित रानाले राजनीतिमा पनि नयाँ उचाइ प्राप्त गर्नुभएकाे छ । झापामा जन्मिनुभएकी ५२ वर्षीया उपसभामुख रानाले जेलमा रहेका कैदीबन्दीका छाेराछाेरीकाे हेरचाह र स्वास्थ तथा शिक्षाका लागि लामो समयदेखि काम गर्दै आउनुभएकाे छ ।
उपसभामुख चयन गरेसँगै प्रतिनिधि सभाकाे अर्काे बैठक माघ १० गते बस्नेगरी स्थगित भएकाे छ ।
