काठमाडौं । नेपाली कांग्रेसका सांसद् प्रकाशशरण महतले प्रधानमन्त्री पुष्पकमल दाहाल प्रचण्डकाे परीक्षा राष्ट्रपति र उपराष्ट्रपति चुनावमा हुने बताउनुभएकाे छ ।
उपसभामुखकाे चुनावपछि संघीय संसद् भवन परिसर नयाँ बानेश्वरमा सञ्चारकर्मीसँग कुरा गर्दै उहाँले एमाले अध्यक्ष केपी शर्मा ओलीबाट संविधानमाथि खतरा रहेकाले प्रधानमन्त्री प्रचण्डको परीक्षा राष्ट्रपति र उपराष्ट्रपति चुनावमा हुने बताउनुभयाे ।
सभामुख र उपसभामुखकाे चुनावमा प्रचण्ड उर्तिण हुन नसक्नुभएकाे आराेप सांसद् महतले लगाउनुभयाे । 'सभामुख र उपसभामुख चुनावमा उहाँ (प्रधानमन्त्री) उत्तीर्ण हुनुभएकाे छैन, अब राष्ट्रपति र उपराष्ट्रपतिको निर्वाचन आउँदैछ त्याे सबैभन्दा महत्वपूर्ण परीक्षणकाे घडी हुनेछ, त्याे परीक्षणमा कहाँतिर उभिने नउभिने उहाँहरुकै हातमा छ'- उहाँले भन्नुभयाे ।
संविधान पक्षमा उभिन्छु भनेकाले नै कांग्रेसले प्रधानमन्त्री प्रचण्डलाई विश्वासको मत दिएकाे दाबी सांसद् महतले गर्नुभयाे । अन्य दलले सत्ता स्वार्थमा केपी ओलीसामु मुण्टो लुकाएर बसेकाे आराेप समेत उहाँले लगाउनुभयाे ।
'हिजो उहाँले संविधान रक्षाका लागि भनेर गठबन्धन गर्नुभएको थियो, उहाँ पुरानो गठबन्धन छाडेर जानुभयो, तर अहिलेको परिवेशमा संविधानमाथि खतरा फेरि प्रकट भएकाे छ, केपी ओलीजी जसरी प्रस्तुत हुनुभएकाे छ, संसद् विघटनलाई उहाँले प्रमुख विषय बनाउनुभएको छ, त्यसर्थ हामी जागरुक भएका हाैं, अब प्रधानमन्त्री जी कहाँ उभिने ? संविधान रक्षाकाे पक्षमा उभिने कि नउभिने उहाँमा निर्भर रहन्छ,अन्य दल पनि संविधान र कानुनी शासनकाे महत्वपूर्ण विषय आउँदा सत्ता स्वार्थमा मुण्टाे लुकाएर बस्ने भयाे भने परिणाम अर्काे आउँछ'-महतकाे भनाइ छ ।
अहिलेकाे गठबन्धन टुटाउन लाग्नुभएकाे हाे भन्ने सञ्चारकर्मीकाे जिज्ञासामा सांसद् महतले त्याे भन्दा पनि संविधानकाे रक्षाका लागि आफूहरु अग्रसर भएकाे बताउनुभयाे । सत्तामा जान नभएर संविधानकाे रक्षाका लागि राष्ट्रपति पदमा जाेड गरेकाे पनि उहाँले बताउनुभयाे ।
