काठमाडाैं । नेकपा एमालेका सांसद् रघुजी पन्तले नचाहिने कुरा निकालेर सरकारलाई विवादमा पार्ने काम नगर्न राप्रपालाई आग्रह गर्नुभएकाे छ ।
बुधबार बसेकाे प्रतिनिधि सभाकाे विशेष समयमा बाेल्दै सांसद् पन्तले सरकारका मन्त्रीकाे ध्यान नचाहिने कुरामा नभएर न्यूनतम साझा कार्यक्रमकाे कार्यान्वयनमा जानुपर्ने बताउनुभयाे ।
राप्रपाका सांसद्ले आफ्नो विचार राख्न सक्ने भएपनि मन्त्रीले धार्मिक राजनीति गर्न नमिल्ने सांसद् पन्तले बताउनुभयाे । धार्मिक विवाद, गणतन्त्रकाे विवाद, संघीयताबारे विवाद नझिक्न उहाँले राप्रपाका सांसद्लाई आग्रह पनि गर्नुभयाे ।
सहरी विकास मन्त्री विक्रम पाण्डेले चितवन पुगेर संघीयता, धर्मनिरपेक्षता र अहिलेको कानुन नमान्ने बताउनुभएकाे थियाे । राष्ट्रिय सभा बैठकलाई सम्बाेधन गर्ने क्रममा प्रधानमन्त्री पुष्पकमल दाहाल प्रचण्डले संघीयता विराेधी अभिव्यक्ति दिने मन्त्रीलाई कारबाही गर्ने बताउनुभएकाे थियाे । सांसद् पन्तले साेही विषय प्रतिनिधि सभामा उठाउनभएकाे हाे ।
संघीयताकाे विषयमा प्रधानमन्त्री प्रचण्ड र राप्रपाका मन्त्रीबीच कुरा बाझिनु राम्राे नभएकाे उहाँले बताउनुभयाे । संविधान र कानुनकाे अधिनमा रहेर मन्त्रीहरुले आफ्नाे काम गर्नुपर्ने भन्दै सांसद् पन्तले संविधानकाे आधारभूत मान्यता विरुद्ध नजान मन्त्रीहरुकाे ध्यानाकर्षण गराउनुभयाे ।
प्रधानमन्त्री र मन्त्रीबीच कुरा बाझिने कुरा देशकाे लाेकतन्त्रका लागि राम्राे लक्षण नभएकाे सांसद् पन्तले बताउनुभयाे । उहाँले भन्नुभयाे - 'संविधान र कानुनअनुसार चल्छु भनेर शपथ लिनुभएका मन्त्रीज्यूहरु, प्रधानमन्त्री ज्यूसँग अन्तरविराेधमा चल्न मिल्दैन, प्रधानमन्त्री र मन्त्रीहरुकाे सार्वजनिक विवाद आएकाे राम्राे हाेइन, यस्ताे महत्वपूर्ण विषयमा उहाँहरुकाे छलफल गर्न जरुरी छ भने मन्त्रिपरिषद्मा छलफल गर्ने हाे, तर संविधानका आधारभूत संरचनाहरुबारे प्रधानमन्त्री र मन्त्रीकाे कुरा बाझिनु कुरा आफैंमा मुलुककाे लाेकतन्त्रका लागि राम्राे लक्षण हाेइन ।'
धर्मलाई राजनीतिक एजेण्डा नबनाउन र संविधान मर्मअनुसार चल्न सांसद् पन्तले सरकारकाे गम्भीर ध्यानाकर्षण गराउनुभयाे । मन्त्रिपरिषद्मा बसेर संविधानकाे बर्खिलाप हुनेगरी बाेल्नु संविधान विपरितकाे कुरा भएकाे भन्दै उहाँले यसले लाेकतन्त्रलाई कमजाेर बनाउने बताउनुभयाे ।
धार्मिक सहिष्णुता जाेगाउन सांसद् पन्तले आग्रह गर्नुभयाे । सरकारप्रति जनताकाे भराेसा रहेकाे भन्दै उहाँले संसद् चलेकाे बेला प्रधानमन्त्री र मन्त्री आएर बसे सदनकाे गरिमा बढ्ने बताउनुभयाे । सांसद् पन्तले देशमा जबरजस्ती क्रिश्चियानिटीको घटना बढेको भन्दै रोक्न समेत माग गर्नुभयाे ।
