काठमाडौं । प्रतिनिधि सभा सदस्य चित्रबहादुर केसीले नेपाल विदेशीको चलखेलको केन्द्र बनेको बताउनुभएको छ ।
बुधबार प्रतिनिधि सभा बैठकमा बोल्दै केसी नेपाल सरकारका उच्च अधिकारी र नेताहरू विदेशीका सामु लम्पसार पर्ने गरेका बताउनुभयो । भरतका विदेश सचिव नेपाल आउँदा नेपालका सरकारी अधिकारी र नेताहरू लाइन लागेर लम्पसार परेका उहाँले बताउनुभयो ।
नेपालका उच्च राजनीतिक नेता, पूर्व प्रधानमन्त्री भारत जाँदा त्यहाँका उच्च अधिकारीलाई भेट्नै नसक्ने तर त्यहाँको एउटा कर्मचारी आउँदा नेपालका राष्ट्र प्रमुख र नेताहरू लाइन लागेर भेट्न जानु लज्जास्पद भएको केसीले बताउनुभयो । ‘राष्ट्रिय स्वाभिमानको बारेमा उहाँहरूलाई अलिकति लाज पनि लाग्दैन ?’ उहाँले प्रश्न गर्नुभयो ।
भूगोलमा देश साना ठुला हुने भए पनि स्वाभिमानको हिसाबले सबै मुलुक बराबर हुने उहाँले प्रष्ट पार्नुभयो । ‘सार्वभौम सत्ता र अखण्डताका हिसाबले राष्ट्र सानो ठुलो हुँदैन’, उहाँले भन्नुभयो ।
नेपालमा राष्ट्रपति कसलाई बनाउने भन्ने विषयमा विदेशीहरूले प्रत्यक्ष हस्तक्षेप सुरु गरेका उहाँले बताउनुभयो । यसले नेपालको राष्ट्रिय स्वाभिमान नै संकटमा पर्न लागेको उहाँले बताउनुभयो । शक्ति राष्ट्रहरूले राष्ट्रपतिको चुनावमा प्रत्यक्ष रूपले आफ्नो देशको अनुकूलको मान्छे राष्ट्रपति बनाउने प्रयत्न सुरु गरेका उहाँले बताउनुभयो । ‘यसले नेपालको स्वाभिमान, राष्ट्रियता र सार्वभौम अखण्डता माथि दखल पुगिरहेको छ’, उहाँले भन्नुभयो ।
विदेशीको आसिरवादबाट दुनो सोझ्याउने काम भइरहेको उहाँले बताउनुभयो । यसले राष्ट्रको इज्जत र स्वाभिमानमा नै खलल पुर्याउने काम भएको उहाँले बताउनुभयो ।
नेपालको राष्ट्रियता र गणतन्त्र माथिको खतरा यो गणतन्त्र ल्याउनेबाट नै भएको उहाँले बताउनुभयो । सत्ताका लागि जानी नजानी गणतन्त्र ल्याउनेले नै गणतन्त्र माथि आक्रमण गरेका उहाँको दाबी छ ।
