काठमाडौं । प्रतिनिधि सभा सदस्य प्रदीप पौडेलले नेपाली कांग्रेसले ढोक्सा थापाको नभई लोकतन्त्र र संविधान जोगाउन प्रयत्न गरेको बताउनुभएको छ ।
बुधबार प्रतिनिधि सभा बैठकमा बोल्दै पौडेलले गणतन्त्र, संविधान र अहिलेको प्रतिनिधि सभा एमालेबाट सुरक्षित नभएकोले त्यसलाई जोगाउन कांग्रेसले प्रयास गरिरहेको बताउनुभयो । ‘नेपाली कांग्रेसले ढोक्सा थापेको होइन, संसद्को स्थायित्वको निम्ति, संसद्लाई सुरक्षित गर्नको निम्ति उभिएको हो’, पौडेलले भन्नुभयो ।
बालकोटमा हतार हतारमा प्रसाद थाप्न बनेको गठबन्धन आज अस्तव्यस्त भएको उहाँले बताउनुभयो । सात दलीय गठबन्धन अहिले चार दलमा झरिसकेको उहाँले बताउनुभयो । ‘जनता समाजवादी पार्टी किन सरकारमा गएन, नागरिक उन्मुक्ति पार्टी किन सरकारमा गएन ? कांग्रेसले ढोक्सा थापेर, राष्ट्रिय प्रजातन्त्र पार्टीका मन्त्रीहरूलाई प्रधानमन्त्रीले नै संसदबाट किन चेतावनी दिनु पर्यो ? कांग्रेसले षडयन्त्र गरेर ? राष्ट्रिय स्वतन्त्र पार्टी सरकारबाट किन बाहिरियो कांग्रेसले बाला देखाएर, फाएर ?’, पौडेलले भन्नुभयो ।
पौडेलले आजको परिस्थिति अहङ्कारले नसम्हालिने बताउनुभयो । अहिले बालकोट र बालुवाटारको दौड बढेको पौडेलले बताउनुभयो ।अहिले राष्ट्रपति भन्दा पनि रबर स्ट्याम्प राष्ट्रपति एमालेलाई चाहिएको उहाँले बताउनुभयो । ‘त्यस्तो राष्ट्रपतिको प्रतिवादमा कांग्रेस उत्रिँदा ढोक्सा थापेको मानिन्छ भने हामी त्यो ढोक्सा राम्रोसँग थाप्न तयार छौँ’, उहाँले भन्नुभयो ।
योग्य र देशको अभिवाक बन्ने खालको राष्ट्रपति बनाउन कांग्रेस प्रतिबद्ध रहेको उहाँले बताउनुभयो । कांग्रेस स्थिरताको पक्षमा रहेकोले गठबन्धन भत्कियोस् भन्ने पक्षमा नरहेको उहाँले बताउनुभयो ।
सुदूरपश्चिमको गठबन्धन भत्किएको बताउँदै उहाँले त्यो कांग्रेसले नभत्काएको उहाँले प्रष्ट पार्नुभयो । अहिलेको गठबन्धन जगदेखि नै हल्लिएकोले त्यहाँको गठबन्धन भत्किएको उहाँले दाबी गर्नुभयो ।
कांग्रेस भित्र थुप्रै समस्या भए पनि एमाले भन्छ प्रजातान्त्रिक पार्टी भएको पौडेलले बताउनुभयो । एमाले अध्यक्षले आफ्नो विरोधीलाई समाप्त पारेको भए पनि कांग्रेसमा त्यस्तो नहुने उहाँले दाबी गर्नुभयो ।
