काठमाडौं । प्रतिनिधि सभा सदस्य गंगाराम चौधरीले नागरिक उन्मुक्ति पार्टीका माघ सम्बोधन गर्न सरकार समक्ष माग गर्नुभएको छ ।
बुधबार प्रतिनिधि सभा बैठकमा बोल्दै चौधरीले माग सम्बोधन नगरे प्रतिनिधि सभा बैठक अवरुद्ध गर्ने चेतावनी दिनुभयो । ‘हाम्रो मुद्दा भनेकै निर्दोष राजबन्दी रिहा हो, लाल आयोगको प्रतिवेदन सार्वजनिक गराउनु हो’, चौधरीले भन्नुभयो ।
थारुवाद नभएर जात भएको उहाँले बताउनुभयो । थारु भूमि पुत्र भएकोले उसले माटो चिन्ने उहाँले बताउनुभयो । थारुले माटोको सुगन्धले नै माटोको जात छुट्याउने उहाँले बताउनुभयो । थारुले माटोको जात छुट्याउने तर फिरन्ते अर्थ विज्ञले मान्छेको जात छुट्याउने उहाँले प्रष्ट पार्नुभयो ।
टिकापुर घटना थारुलाई पशु समान सोच्ने राज्य सञ्चालकको प्रवृत्तिको कारण भएको उहाँले बताउनुभयो । टिकापुर घटना माटोको जातको कारण होइन, मान्छेको जातको कारणले भएको उहाँको दाबी छ । दुवै पक्षको हानाहानमा प्रहरी मारिएका र निर्दोष थारुलाई सो घटनाको दोषी बनाएर जेल हालेको उहाँले बताउनुभयो ।
उहाँले थारु आन्दोलन अब सदनमा पनि सुरु भएको बताउनुभयो । ‘जबसम्म लाल आयोग प्रतिवेदन सार्वजनिक हुन्न, तबसम्म सदन चल्न सक्दैन, कानुन एउटाले पालना गर्नु पर्ने अर्कोले लत्त्याउने हुँदैन, कानुन सर्वोपरि हुनुपर्छ, राज्यले विना कसुर झुटा मुद्दा लगाएर थारुलाई थुन्न पाउँदैन’, उहाँले भन्नुभयो ।
उहाँले निर्दोष नागरिकलाई थुनेको बताउनुभयो । सरकारले उहाँहरूलाई थुनामुक्त नगरे टिकापुर घटनाका दोषीहरू देखाइदिने तागत आफूहरूसँग रहेको उहाँले बताउनुभयो । ‘होइन भने सदन मात्र होइन, सडक पनि ठप्प पारिदिन्छौँ’, उहाँले चेतावनी दिनुभयो ।
