काठमाडाैं । राष्ट्रिय सभाका अध्यक्ष गणेशप्रसाद तिमिल्सिना र संयुक्त अरब इमिरेट्स (युएई)को संघीय राष्ट्रिय काउन्सिलका सभामुख सक्युर घोबासबीच भेटवार्ता भएकाे छ ।
युएई भ्रमणमा रहनुभएका राष्ट्रिय सभा अध्यक्ष तिमिल्सिना र सभामुख घोबासबीच अबुधाबीस्थित साे काउन्सिलमा साेमबार शिष्टाचार भेटवार्ता भएकाे हाे । अध्यक्ष तिमिल्सिना र युएईका सभामुख घोबासबीच दुई देशबीचको द्विपक्षीय सम्बन्धका विविध आयाममा छलफल गर्नुभएको अबुधाबीस्थित नेपाली राजदूतावासले जनाएको छ ।
उहाँहरूले नेपालीको एक प्रमुख रोजगार गन्तव्यका रूपमा युएई रहेकाले त्यसलाई थप व्यवस्थित गरी पारस्परिक हितमा हुने गरी सहकार्य गर्नुपर्नेमा जोड दिनुभएकाे पनि दूतावासले जनाएकाे छ ।
भेटमा अध्यक्ष तिमिल्सिनाले युएईमा नेपालीले आर्जन गरेको सीपलाई नेपालमा पनि प्रयोग गरी देशको विकासमा योगदान पुर्याउने सम्भावना रहेको बताउनुभयो । उहाँले युएईमा काम गर्ने नेपालीको हकहित तथा सुरक्षा अभिवृद्धि गर्ने सम्बन्धमा पनि दुई देशबीच भइरहेको सहकार्यलाई थप सुदृढ गर्नुपर्ने बताउनुभएको थियो ।
भेटमा अध्यक्ष तिमिल्सिनाले दुई देशबीच रोजगारीका साथै लगानी, वैदेशिक सहयोग र जनस्तरको सम्बन्धलाई थप सुमधुर बनाउनुपर्ने बताउनुभएकाे थियो । नेपाल सरकारले विदेशी लगानीलाई उच्च प्राथमिकता दिएको जानकारी गराउँदै अध्यक्ष तिमिल्सिनाले युएईका ठूला लगानीकर्तालाई नेपालको पर्यटन, जलविद्युत्, चिकित्सा शिक्षा, पूर्वाधार र सेवा लगायत क्षेत्रमा लगानी गर्न आग्रह गर्नुभयो ।
भेटमा नेपालको तर्फबाट मुस्लिम आयोगका अध्यक्ष समिम मियाँ अन्सारी, युएईका लागि नेपाली राजदूत कृष्णप्रसाद ढकाल तथा युएईका तर्फबाट साे काउन्सिलका उच्च अधिकारी समेतको सहभागिता थियो ।
