काठमाडौं । दलित समुदायका विभेद र उत्पीडनहरुको अन्त्य गरी सामाजिक-सांस्कृतिक, आर्थिक, राजनीतिक समानता, समृद्धि र सामाजिक न्याय सुनिश्चित गर्ने सम्बन्धी संकल्प प्रस्ताव राष्ट्रिय सभाबाट स्वीकृत भएकाे छ ।
बुधबार बसेकाे राष्ट्रिय सभा बैठकबाट साे प्रस्ताव सर्वसम्मतिले स्वीकृत भएकाे हाे । सभाबाट स्वीकृत प्रस्ताव कार्यान्वयन गर्न राष्ट्रिय सभा अध्यक्ष गणेशप्रसाद तिमिल्सिनाले सरकारलाई निर्देशन दिनुभयाे । उहाँले सभा अन्तर्गतका विषयगत समितिलाई आफ्नाे कार्यक्षेत्रसँग सम्बन्धित साे संकल्प प्रस्ताव सम्बन्धनमा निरन्तर अनुगमन पनि निर्देशन दिनुभयाे ।
राष्ट्रिय सभा सदस्य भुवन सुनार प्रस्तावक र सुरेश आले, गोपी अछामी, तुलप्रसाद विश्वकर्मा, नरपति लुहार, जगतबहादुर पार्की, सिंहबहादुर विश्वकर्मालगायत सांसद् समर्थक रहेकाे साे प्रस्तावमाथि राष्ट्रिय सभामा छलफल भएकाे थियाे । प्रस्तावमा उठेका प्रश्नकाे प्रधानमन्त्री पुष्पकमल दाहाल प्रचण्डले जवाफ दिनुभएकाे थियाे ।
साे प्रस्तावमाथिकाे छलफलमा बाेल्दै सांसद्हरुले राजनीतिक तथा संवैधानिक रुपमा सबै जातजाति समान भए पनि व्यवहारमा नदेखिएको भन्दै सरकारको ध्यानाकर्षण गराएका छन् ।
