काठमाडाैं । नेपाली कांग्रेसका सांसद् रामहरी खतिवडाले दुर्घटनामा परेका घाइतेको नि:शुल्क रुपमा उपचार गर्न सरकारसँग माग गर्नुभएकाे छ ।
आइतबार बसेकाे प्रतिनिधि सभा बैठककाे सुरुमा समय लिएर बाेल्दै सांसद् खतिवडाले थोत्रा बस र बीमा नहुँदा दुर्घटनाका घाइतेकाे बिचल्ली भइरहेकाे भन्दै यसतर्फ ध्यान दिन सरकारसँग माग गर्नुभयाे ।
आफ्नो गृह जिल्लाको ओखलढुंगामा हालै भएकाे जीप र बस दुर्घटनाबारे जानकारी गराउँदै उहाँले सिटामोल समेत नपाएर जनताले ज्यान गुमाउनुपर्ने अवस्था रहेको बताउनुभयाे ।
अस्पतालले डिपोजिट माग्ने र पीडितले उपचार गर्न नसक्ने अवस्था रहेकाे भन्दै सांसद् खतिवडाले पहुँचवालालाई उपचार खर्चका नाममा जति पनि बाँड्ने तर नागरिकले उपचार नपाउनु बिडम्वनापूर्ण रहेको बताउनुभयाे । उहाँले भन्नुभयाे - 'मान्छेहरु सिटामोल नपाएर मर्ने स्थिति भएको छ, राज्यले अर्बौं पैसा पहुँचवालालाई दिने परम्परा छ, तर दुरदराजबाट यसरी दुर्घटनामा परेर आएका बिरामी शुद्ध उपचार गर्न नसकेर घर बेच्नुपर्ने, जग्गा बेच्नुपर्ने अवस्था सृजना भएकाे छ, यस्ता घटना-दुर्घटनाका बिरामीलाई राज्यले नि:शुल्क उपचारको व्यवस्था गरोस् ।'
उहाँले बस-जीपमा यात्रा गर्नु हरेक यात्रुको बीमा गर्ने व्यवस्था मिलाउन सरकारसँग माग गर्नुभयाे ।
