काठमाडाैं । राष्ट्रिय सभा सदस्य डा. विमला राई पौड्यालले मिटरब्याजीहरुलाई संरक्षण नगर्न दलहरूसँग आग्रह गर्नुभएकाे छ ।
बिहीबार बसेकाे राष्ट्रिय सभा बैठकमा बोल्दै सांसद् पाैड्यालले कार्यकर्ताले संरक्षण गरे-नगरेको विषयमा दलहरू बोल्नुपर्ने बताउनुभयाे । पाैड्यालले मिटरब्याजी पीडितकाे माग सम्बाेधन गर्न सरकारकाे पनि ध्यानाकर्षण गराउनुभयाे ।
उहाँले भन्नुभयाे - 'हामी दलका कार्यकर्तालाई हामीले संरक्षण गरिरहेका छौँ ? दलहरूले बोल्नुपर्यो, सबै राजनीतिक दलहरूलाई चुनौती हो यो, सबै राजनीतिक दलहरूले आफ्ना दलबाट त्यस्ता कामहरू भएका छन् भने आफूले संरक्षण गरेका आफ्ना भोटरबाट आफ्ना समर्थकबाट भएका छन् भने त्यो हुन दिनुभएन, त्यो काम राजनीतिक दलहरूले गर्नुपर्यो ।'
मिटरब्याज पीडितहरुले मिटरब्याजीहरुलाई दलकै कार्यकर्ताले संरक्षण गरेकाे बताएका सांसद् पाैड्यालले बताउनुभयाे । उहाँले भन्नुभयाे - 'हिजो हामी जाँदा त्यहाँका महिलाहरूले के भन्नुभयो भने नि, उहाँहरू दलका कार्यकर्ता हुन्, दलका नेताहरू हुन्, उहाँहरूले सिडिओ, पुलिसलाई चिन्नुहुन्छ त्यसकारण हामीले न्याय पाउँछौँ ?'
मिटरब्याजलाई संविधान र कानुनले पनि नचिन्ने भन्दै सांसद् पाैड्यालले सरकारले बनाएकाे कार्यदलले यसमा गम्भीर रुपमा छलफल गरेर आवश्यक कानुन ल्याउनुपर्ने बताउनुभयाे । उहाँले भन्नुभयाे - 'सरकारले बनाएकाे कार्यदलले के गर्दैछ ? यो कुरा एकदमै प्राथमिकतामा राखेर कानुन कहाँनिर संशोधन गर्नुपर्छ, कानुन संशोधन गर्नुपर्यो, मेरो विचारमा मिटरब्याजलाई संविधानले पनि चिन्दैन, अर्थतन्त्रले पनि चिन्दैन र कानुनले पनि चिन्दैन, नचिन्ने मिटरब्याजी कहाँबाट आयो ? हामीले किन त्यसलाई औपचारिकता दिइराखेका छौँ ? मलाई थाहा छैन, कानुन छैन भने तुरुन्तै ल्याउनुपर्यो ।'
सांसद् पाैड्यालले मिटरब्याजी पीडितहरुलाई मिटरब्याज प्रणाली गैरकानुनी हाे भनेर जनचेतना जगाउनुपर्ने बताउनुभयाे । उहाँले भन्नुभयाे - 'उहाँहरुलाई थाहा छैन गैरकानुनी हाे भनेर, विभिन्न सामग्रीहरु बनाएर लिएर जानुपर्याे याे गैरकानुनी हाे तिमीले यसरी लाेन लिन पनि मिल्दैन, दिन पनि मिल्दैन, ब्याज तिर्न पनि मिल्दैन, कागजकाे चिरकटाेमा घरखेत खाेस्न मिल्दैन, याे कुरा लैजानुपर्याे ।'
सांसद् पाैड्यालले न्याय माग्न आएकाहरुलाई खुल्लामञ्चमा बस्न नदिएर थप अन्याय गर्ने काम भएकाे भन्दै आपत्ति जनाउनुभयाे । उहाँले भन्नुभयाे - 'खुल्लामञ्चमा बस्न दिइएन उहाँहरूलाई, खुलामञ्च काठमाडौंको मात्रै पेवा रहेछ, मधेशबाट आउने मधेसी महिलाहरूले त्यहाँ खुट्टा टेक्न नपाउने ?'
सांसद् पाैड्यालले पञ्चायत कालमा जस्तै अहिले पनि तमशुक लेखेर निरक्षर विशेषगरी महिलालाई सही गराएर घर खेत लुट्ने काम भइरहेकाे आफूहरुले पाएकाे बताउनुभयाे । पञ्चायत कालमा गरिबमाथि ज्यादती हुँदा आफूहरुले पञ्चायती व्यवस्थाले याे थिचाेमिचाे भएकाे हाे भनेर उनीहरुलाई जनचेतना जगाउँदै पञ्चायती व्यवस्था फाल्न एकजुट बनाएकाे स्मरण गर्नुभयाे । उहाँले भन्नुभयाे - 'गरिब निमुखालाई मर्दा पर्दा केही रकम दिने, ५ हजार दिएकाे छ भने ५० हजार बनाएर तमशुक गर्ने र उनीहरु, त्यतिबेला हामीले ५० रुपैयाँकाे तमशुक भनेर नाटक नै देखाएका पनि थियाैं ।' सांसद् पाैड्यालले त्यतिबेला पञ्चायती व्यवस्था ढाल्न एकजुट हुनुपर्छ र संघर्षशील हुनुपर्छ भनेर आफूहरुले गीत गाउँने गरेकाे स्मरण गर्नुभयाे । उहाँले भन्नुभयाे - 'धानै खायाे गाइतारे मालेले, गाउँ खायाे गाउँघरका जालीले, खेती मिच्याे बेइमानी नापीले, गरिब मार्याे दाइ घूस खाने पापीले, मैना चरी रुदैछ धरधरी गरिबकाे दाई खाेसियाे घरबारी भनेर गीत गाउँथ्याैं र तीनै गरिबकाे साथ लिएर पञ्चायती व्यवस्था फालेकाे हाे, तीनै गरिबकाे साथ लिएर थुप्रै आन्दाेलन भए, लाेकतन्त्र गणतन्त्र आए ।'
काठमाडाैंमा आएका मिटरब्याजी पीडितलाई भेट्दा आफूहरुलाई मुख देखाउन पनि लाज भएकाे बताउँदै सांसद् पाैड्यालले भन्नुभयाे - 'किनभने उहाँहरुलाई नै जनचेतना जगाएर याे लाेकतन्त्र गणतन्त्र ल्याएकाे ? अहिले पनि उहाँहरु त्यही ठाउँमा हुनुहुन्छ, डेढ लाख रुपैयाँ लिएकाे १ लाख त तिरेकाे, ५० हजार लिएकाे हाे ६३ हजार त ब्याज तिरिसकेँ भन्नुभएकाे छ, घरखेत पनि गयाे ।'
