काठमाडाैं । राष्ट्रिय स्वतन्त्र पार्टी (रास्वपा) की सांसद् निशा डाँगीले राष्ट्रपति कार्यालय, प्रधानमन्त्री कार्यालय र सदनमा स्वदेशी वस्तु मात्रै प्रयोग हुने व्यवस्था गर्न सरकारसँग माग गर्नुभएकाे छ ।
आइतबार बसेकाे प्रतिनिधि सभा बैठकको शून्य समयमा बोल्दै सांसद् डाँगीले शीतल निवास, सिंहदरबार, संसद् भवन र बालुवाटारमा नेपाली उत्पादन मात्रै प्रयोग गरी ती ठाउँलाई आत्मनिर्भर बनाउन सरकारकाे ध्यानाकर्षण गराउनुभयाे ।
आर्थिक वर्ष २०८८-०७९ मा ८८ हजार किलाे बराबरकाे टुटपिथ र करिब २६ लाख बराबरकाे ट्वालेट पेपर भित्रिएकाे भन्दै उहाँले यी दुबैमा करिब ४१ कराेड बराबर खर्च बाहिरिएकाे बताउनुभयाे । यी त उदाहरण भएका मात्रै भन्दै सांसद् डाँगीले टुटपेस्टदेखि स्याम्फुसम्म, माेबाइदलदेखि कार र चामलसम्म आयात गर्ने अवस्था रहेकाे बताउनुभयाे ।
आन्तरिक उत्पादन बढाउनका लागि छलफल चलाउन पनि उहाँले सरकारलाई आग्रह गर्नुभयाे । सांसद् डाँगीले भन्नुभयाे - 'आन्तरिक उत्पादन बढाउन राज्यले के कस्तो नीति बनाएको छ ? ती कुराहरु अंकमा देखिने गरी किन लागू भएनन् ? समीक्षा गरी आंगिक सुधार हुने गरी नीति ल्याउन छलफल चलाउन सभामुखमार्फत् सरकारको ध्यानाकर्षण गराउन चाहन्छु ।'
सांसद् डाँगीले आफू बसीरहेको कुर्सी, प्रधानमन्त्री बसिरहेको कुर्सी र सभामुख बसिरहेकाे कुर्सी कुन देशबाट आयात गरिएको हो भन्दै सरकारलाई प्रश्न समेत गर्नुभयाे । उहाँले भन्नुभयाे - 'म सदनमा बसिरहेको कुर्सी कुन देशबाट आयात भएको हो ? कि नेपालमा नै बनेको हो ? कुर्सीका लागि जुन झगडा हुने गरेको छ, प्रधानमन्त्री, सभामुखको कुर्सी, त्यो कुन देशबाट आयात भएको हो ?, सिंहदरबार, बालुवाटार, शीतलनिवास र यो सदनको क्षेत्रलाई आत्मनिर्भर घोषणा गरौं, यहाँ प्रयोग हुने कुर्सीदेखि माईकसम्म, कलमदेखि कापीसम्म सबै नेपाली प्रयोग गर्नका लागि सभामुखमार्फत सरकारको ध्यानाकर्षण गराउन चाहन्छु ।'
