काठमाडाैं । राष्ट्रिय स्वतन्त्र पार्टी (रास्वपा) का सांसद् हरि ढकालले नेपालमा संस्थागत भ्रष्टाचारले जराे गाडेकाे बताउनुभएकाे छ ।
बिहीबार बसेको प्रतिनिधि सभा बैठककाे आकस्मिक समयमा बोल्दै उहाँले त्रिभुवन अन्तर्राष्ट्रिय विमानस्थलमा विदेशबाट ल्याइएका शव बोकेको बाकस समेत फाेडिएकाे बताउनुभयाे । सांसद् ढकालले केही सामान छ कि भनेर लुट्नलाई शवकाे बाकस पनि नछाेडिएकाे र याे संस्थागत भ्रष्टाचारकाे एउटा नमुना रहेकाे बताउनुभयाे ।
उहाँले भन्नुभयाे - 'विदेशबाट शव ल्याउँदा शवको बाक्सा फोरिएको छ एयपोर्टमा, केही सामान छ कि भनेर लुट्नलाई, लगेज र ब्यागहरू फुटेको त जानकारी थियो, समाज कहाँ जादैछ ? समाज के बन्दैछ ? शवका बाक्साहरु फाेडिएकाे छ, कारण के हो ? कारण भ्रष्टाचार यसरी संस्थागत भएछ कि, यसरी जरोसम्म पुगेछ कि शव बोकेको बाक्सा पनि एयरपोर्टमा फुट्छ, अनाैठाे छ एयरपोर्ट, लागूऔषध बोकेको यताको स्क्रिनले देख्दैन, कतारको एयरपोर्टमा पुग्छ, शव बोकेको बाकस फोरिन्छ ।'
सांसद् ढकालले गरिब चेपाङ बालबालिकाकाे दिवा खाजामा समेत भ्रष्टाचार भएकाे बताउनुभयाे । उहाँले भन्नुभयाे - 'संस्थागत यति भएछ भ्रष्ट्राचार गरिब चेपाङ कुपोषित बच्चाको दिवा खाजा लुट्छ, दिवा खाजामा भ्रष्टाचार छ, भिडियाे देख्नुभएकाे थियाे हाेला मेराे क्षेत्रकाे ।'
भुइँमान्छेमाथि भइरहेका डरलाग्दा घटनाकाे मुख्य कारण बेथिति रहेकाे सांसद् ढकालले बताउनुभयाे । देशकाे सुरक्षा स्थिति कस्ताे छ भनेर देखिने पहिलाे विमानस्थल र दाेस्राे सामुदायिक विद्यालय रहेकाे उहाँले बताउनुभयाे ।
त्रिभुवन अन्तर्राष्ट्रिय विमानस्थलबाट गएका एक जना व्यक्तिलाई झुक्याएर उनकाे झोलामा लागूऔषध राखेकाे विषयमा अनुसन्धान हाेस् भनेर गृहमन्त्रीकाे ध्यानाकर्षण गराएपनि त्यसबारे चासाे नदिइएकाे बताउनुभयाे । उहाँले भन्नुभयाे - 'एउटा गरिब किसानकाे छाेराेलाई अन्याय भएकाे छ, जाे कतारकाे जेलमा छ भन्ने पत्ता लगाउन नै ८ महिना लाग्याे, उसलाई कतारमा १० वर्ष कैद र ३ लाख रियाल जरिवाना तोकिएको छ, याे भन्दा कारुणिक के हुन सक्छ ?'
यस्तै प्रकृतिकाे घटनामा कैयाैं नेपालीहरु विदेशका जेलमा हुन सक्ने भन्दै उहाँले नेपाली दूतावाससँग कुनै तथ्यांक नभएकाे बताउनुभयाे ।
