काठमाडाैं । सरकारका प्रवक्त एवं सञ्चार तथा सूचना प्रविधि मन्त्री रेखा शर्माले राष्ट्र हित भन्दा बाहिर गएर कुनै पनि विधेयक अघि नबढ्ने बताउनुभएकाे छ ।
शुक्रबार बसेको प्रतिनिधि सभा बैठकमा बाेल्दै मन्त्री शर्माले दूरसञ्चार ऐनलाई लिएर भ्रमपूर्ण विषय बाहिर आइरहेको भन्दै राष्ट्र हितभन्दा बाहिर गएर कुनै पनि विधेयक अघि नबढ्ने दाबी गर्नुभयाे ।
दूरसञ्चार विधेयक प्रारम्भिक मस्यौदा तयारीको अवस्थामा रहेकाले गलत काम हुन नदिने र गर्न नदिनेमा आफू स्पष्ट रहेको दाबी उहाँले गर्नुभयाे ।
दूरसञ्चार ऐनलाई अन्तिम रुप दिनका लागि सरोकारवालाहरुसँगको छलफल र यसअघिको कानुनलाई टेकेर मात्रै अघि बढ्ने मन्त्री शर्माले बताउनुभयाे ।
दूरसञ्चार ऐन २०५३ लाई खारेज गरेर नयाँ दूरसञ्चार विधेयक तर्जुमा गर्न कानुन, न्याय तथा संसदीय मामिला मन्त्रालयबाट स्वीकृति प्राप्त गरिसकेको जानकारी दिँदै उहाँले साे विधेयकको विषयमा प्रारम्भिक मस्यौदा तयार गर्न छलफल सुरु भएको बताउनुभयो ।
मन्त्री शर्माले दूरसञ्चार सेवाको गुणस्तर अभिबृद्धि गरी सर्वसुलभ र सबैको पहुँचमा पुर्याउनका लागि काम भइरहेको जानकारी दिनुभयो ।
