काठमाडाैं । प्रमुख प्रतिपक्षी नेकपा एमालेले स्मार्ट टेलिकम प्रालीकाे नविकरण लगायत नाममा २८ अर्बकाे चलखेल हुन लागेकाे भन्दै कडा आपत्ति जनाउनुभएकाे छ ।
बुधबार बसेकाे प्रतिनिधि सभा बैठककाे आकस्मिक समयमा बाेल्दै एमाले संसदीय दलका प्रमुख सचेतक पदम गिरीले अर्बाैं बक्याैता रकम नलिइ स्मार्ट टेलिकम प्रालीकाे नविकरण गर्ने निर्णय मन्त्रिपरिषद्ले गर्न लागेकाे भन्दै आपत्ति जनाउनुभएकाे हाे ।
बुविभिन्न शीर्षककाे ५ अर्ब र नविकरण गर्दा लाग्ने करिब २३ अर्ब नलिइ स्मार्टको नविकरण गर्ने काममा ठूलै आर्थिक चलखेल भएको हुनसक्ने भन्दै उहाँले स्मार्टलाई सहयाेग गरेर सरकारले २८ अर्ब डुबाउन लागेकाे बताउनुभयाे । स्मार्टले नेपाल दूरसञ्चार प्राधिकरणबाट २५ वर्षका लागि अनुमति प्राप्त गरेकाे र विद्यमान ऐनमा १० वर्षमा नविकरण गर्नुपर्ने व्यवस्था रहेकाे उहाँले स्मरण गराउनुभयाे ।
प्रमुख सचेतक गिरीले भन्नुभयाे - 'आज स्मार्ट टेलिकम प्रालिले नेपाल सरकारलाई विभिन्न शीर्षकमा ५ अर्ब दस्तुर तिर्न बाँकी छ र नविकरण गर्दाखेरी अर्को २३ अर्ब रुपैयाँ राज्यलाई तिर्नुपर्ने हुन्छ, तर आज स्मार्टले नविकरण बापतको २३ अर्ब रुपैयाँ पनि नतिर्ने, विभिन्न शीर्षकको ५ अर्ब दस्तुर पनि नतिरी आफ्नो नविकरण गराउनका लागि मन्त्रीहरुको घरघरमा पुगेको, फ्यामिली क्वार्टरमा पुगेको, मन्त्रालय धाएको भन्ने सुन्नमा आएको छ, अहिले मन्त्रिपरिषद्ले १-२ दिनभित्रै यो शुल्क र त्याे दस्तुर नलिईकन यसलाई नविकरण गर्ने योजना बनिरहेको छ भन्ने कुरा आएको छ ।'
उहाँले मन्त्रिपरिषद्ले निर्णय गर्दा देशकाे २८ देखि ३० अर्ब रुपैयाँमा डुबाउने काम हुने बताउनुभयाे । प्रमखु सचेतक गिरीले भन्नुभयाे - 'यदि यस्तो प्रकारको निर्णय हुन्छ भने देखि मुलुकलाई २८-३० अर्ब रुपैया डुबाउने काम हुँदैछ र नीतिगत भ्रष्टाचार हुँदैछ, यसमा धेरै ठूलो चलखेल छ भन्ने कुरा मिडियामा आएको हुनाले यसतर्फ सभामुख महोदयमार्फत् सरकारको गम्भिरतासाथ ध्यानाकर्षण गराउन चाहन्छु ।'
