काठमाडौं । संघीय मामिला तथा सामान्य प्रशासनमन्त्री अमनलाल मोदीले राजनीतिक हस्तक्षेपका कारण कर्मचारी परिचालनमा निक्कै समस्या भइरहेकाे बताउनुभएकाे छ ।
बुधबार बसेकाे प्रतिनिधि सभा बैठकमा सार्वजनिक महत्त्वको विषयबारे बोल्दै मन्त्री माेदीले पार्टी पिच्छेका मन्त्री, सांसद्, मेयर, उपमेयर लगायत जनप्रतिनिधिले आफू अनुकूल कर्मचारी माग्ने गरेका बताउनुभयाे ।
उहाँले भन्नुभयाे - 'संघीय मामिला मन्त्रालयमा मन्त्रालयमा दैनिक रुपमा भीड हुन्छ, एउटा मेयर आउनुहुन्छ मलाई फलानाे कर्मचारी चाहियो भन्नुहुन्छ, कर्मचारी पठायो, अर्को साथी आउनुहुन्छ र मलाई नसोधी किन पठाएको भन्नुहुन्छ ? त्यहाँको प्रतिनिधि सभाको सांसद्, प्रदेश सभाकाे सांसद् र उपमेयर म हो भनेर भन्नुहुन्छ ।'
स्थानीय तहमा मात्र नभएर संघीय मन्त्रालय र प्रदेशहरुले पनि आफू अनुकूलका कर्मचारी मात्रै चाहियो भन्ने गरेका र यसले गर्दा कर्मचारी परिचालनमा समस्या भएकाे मन्त्री माेदीले बताउनुभयाे । उहाँले भन्नुभयाे - 'प्रदेशमा पनि सरकारी कर्मचारी सचिव हुन्छन्, उपसचिव जानुहुन्छ, त्यहाँ मन्त्री साथी पनि फरक-फरक दलका हुनुहुन्छ उहाँहरुले भन्नुहुन्छ हामीलाई सहज बनाउन फलानाे सचिव-उपसचिव पठाउनुपर्याे, केन्द्रमा पनि मन्त्री साथीहरुले अनुकूल कर्मचारी पठाउनुपर्याे भन्नुहुन्छ ।'
मन्त्री र मेयर उपमेयरको अनुकूल पर्नेगरी कर्मचारी खटाउँदा जम्मा २ हजार मात्रै खटाउन सकिने भन्दै मन्त्री माेलीले प्रश्न गर्नुभयाे - 'संघमा ५३ हजार कर्मचारी छन्, ५१ हजार कर्मचारी कहाँ पठाउने ?' सबै कर्मचारी सुगम ठाउँ र काठमाडाैं उपत्यकामा मात्र बस्न चाहाने र दुर्गममा जानै नचाहने बताउनुभयाे । दुर्गम र सुगम मिलाएर उनीहरुको सरुवा प्रणालीलाई व्यवस्थित बनाउने कामलाई आफूले अघि बढाएको दाबी उहाँले गर्नुभयाे ।
आफूले मन्त्रालय सम्हाल्दा ७ सय ५३ स्थानीय तहमा २ सय ४१ ठाउँमा कार्यकारी अधिकृतबिहीन रहेको र त्यहाँ निमित्तले चलाइरहेको जानकारी दिँदै मन्त्री माेदीले अहिले थप ६० वटामा कार्यकारी अधिकृत पठाइएकाे बताउनुभयाे । काठमाडौं र त्यस वरपर मात्रै रहने विकृति देखिएकाे भन्दै उहाँले त्यसलाई अन्त्य गर्न आफू लागि परेको बताउनुभयाे । कर्मचारी सरुवा प्रणालीलाई व्यवस्थित बनाइने भन्दै उहाँले यसमा आफूले सक्दाे प्रयास गरिरहेकाे बताउनुभयाे ।
