काठमाडाैं । नेकपा एमालेका सांसद् याेगेश भट्टराईले एकीकृत समाजवादीका अध्यक्ष माधवकुमार नेपालकाे अभिव्यक्तिप्रति कडा आपत्ति जनाउनुभएकाे छ ।
नयाँ बानेश्वरस्थित संघीय संसद् भवनमा बुधबार सञ्चारकर्मीसँग कुरा गर्दै एमाले सचिव समेत रहनुभएका सांसद् भट्टराईले एमालेबाट प्रतिनिधि सभा विघटन हुन सक्छ भन्ने नेपालकाे अभिव्यक्तिप्रति आपत्ति जनाउनुभयाे ।
सुनसरीको इनरुवामा बुधबार सञ्चारकर्मीसँग कुरा गर्दै अध्यक्ष नेपालले प्रतिनिधि सभा विघटन गरी मध्यावधी चुनावमा जाने दाउमा एमाले रहेको गम्भीर आराेप लगाउनुभएकाे थियाे । त्यसकाे जवाफ दिँदै याेगेशले हाेसमा हुनुहुन्छ कि हुनुहुन्न भन्दै प्रश्न गर्नुभयाे ।
माधवको बोली शंकास्पद रहेको भन्दै उहाँले नेपाल दुरुस्त भएर बोलेको जस्तो नलागेको बताउनुभयाे । प्रतिपक्षमा रहेकाे एमालेले संसद् विघटन गर्न सक्छ भन्नुले माधव नेपालकाे बाेली नै शंकास्पद रहेकाे सांसद् भट्टराईले बताउनुभयाे ।
उहाँले भन्नुभयाे -'पूर्व प्रधानमन्त्री माधव नेपालले एमालेबाट संसद विघटन हुन लागेको छ सबै सचेत हौं भन्नुभएछ, मैले बुझेको माधव नेपाल कुनै नचाहिँदो चिज सेवन गर्नुहुन्न मध्यपान-धूमपानबाट अलिकति टाढा रहेको भन्ने नै मैले बुझ्छु माधव नेपाललाई, तर आजको उहाँको बोली हेर्दा अलि शंकास्पद छ, उहाँले आफू दुरुस्त भएर त्यो बोलेको जस्तो लाग्दैन, जुन पार्टी प्रतिपक्षमा छ त्यसले कसरी संसद विघटन गर्छ ? उहाँले के भन्दै हिँड्नुभएको छ ? सपना देख्नुभएको छ कि ? विपनामा हुनुहुन्छ कि ? होसमा हुनुहुन्छ कि ? हुनुहुन्न कि ? उहाँजत्तिको १५ वर्ष एउटा ठूलो पार्टीको नेतृत्व गरेको मान्छेले, प्रधानमन्त्री भइसकेको मान्छेले, यति अनुभवी राजनीतिज्ञले त्यस्तो बोल्ने ?'
माधव नेपालसँग संगत नगरेकाे एक-डेढ वर्ष भइसकेकाे भन्दै सांसद् भट्टराईले भन्नुभयाे - 'यो एकडेढ वर्षमा उहाँ धेरै बदलिनुभएछ ।'
