काठमाडाैं । राष्ट्रिय स्वतन्त्र पार्टी (रास्वपा) की सांसद् सुमना श्रेष्ठले राजनीतिमा महिलाकाे याेगदानकाे लेखाजाेखा नै नभएकाे बताउनुभएकाे छ ।
बुधबार बसेकाे प्रतिनिधि सभा बैठककाे विशेष समयमा बाेल्दै सांसद् श्रेष्ठले मुलुकको शासन व्यवस्था परिवर्तनका लागि राजनीतिका क्षेत्रमा महिलाले पुर्याएको योगदानको कुनै लेखाजोखा नै नभएको भन्दै आपत्ति जनाउनुभयाे ।
महत्वपूर्ण याेगदान हुँदाहुँदै पनि जनजिब्राेमा महिलाहरुकाे नाम विरलै आउने गरेकाे उहाँले बताउनुभयाे । राणा विराेधी आन्दाेलनदेखि लिएर पहिलाे, दाेस्राे जनआन्दाेलन र जनविद्राेहमा धेरै महिलाले बलिदान र त्याग रहेकाे भन्दै सांसद् श्रेष्ठले राजनीतिक त्यागमा पुरुष नेताकै नाम आउनेगरी भास्य निर्माण भएकाे बताउनुभयाे ।
राेलमाेडल हुँदाहुँदै पनि याेगमाया, साधना प्रधान, सहाना प्रधान, मंगलादेवी सिंह, शैलजा आचार्य, नाेना काेइराला, द्वारिकादेवि ढकुरानी, सुप्रभा घिमिरे, मिना पाण्डे, मिठाइदेवी लगायतकाे नाम जनजिब्राेमा नरहेकाे उहाँले बताउनुभयाे ।
परिवर्तनमा महिलाको ठूलो योगदान भएपनि त्यसअनुसार अवसर र जिम्मेवारी पाउन नसकेको भन्दै सांसद् श्रेष्ठले महिलाका त्याग र नेतृत्वका कथा इतिहासमा नअटाइनु संस्थागत बहिष्कार गरेकाे जस्तै लागेकाे बताउनुभयाे । यसरी बहिष्कार गर्नु अग्रजमाथि मात्र नभएर भावी पुस्तामाथि पनि अन्याय हुने उहाँले बताउनुभयाे ।
परिवर्तनकाे विगुल यसअघिकै महिलाले गरिसकेका भन्दै उहाँले अब जाेखिम माेल्ने पालाे आफूहरुकाे भएकाे बताउनुभयाे । धेरै आराेपहरु आउने भन्दै सांसद् श्रेष्ठले काम बल्ल सुरु भएकाे बताउनुभयाे । उहाँले हरेक पार्टीभित्र र बाहिर क्रान्ति चाहिएकाे बताउनुभयाे ।
महिलाको योगदानबारे अनुसन्धान गरी दस्ताबेज तयार पारेर पाठ्यक्रममा समावेश गर्न सांसद् श्रेष्ठले सरकारकाे ध्यानाकर्षण गराउनुभयाे । उहाँले भन्नुभयाे - 'राज्यले महिलाकाे याेगदान र अग्रणी महिला नेताकाे बारेमा राज्यस्तरबाटै अनुसन्धान गरेर दस्तावेजीकरण गरियाेस् र विद्यालयकाे पाठ्यक्रममै समावेश गरियाेस्, सम्पदा पदयात्राजस्तै स्वतन्त्रता पदयात्रा आयाेजना गरियाेस्, हरेक चाैतारी जहाँ महिलाहरुले भाषण गरेका थिए त्यसमा अभिलेख राखियाेस् ।'
