काठमाडौं । नेपाली कांग्रेसका सांसद् जितेन्द्रनारायण देवले राष्ट्रिय सभालाई सरकारले संघीय संसद्को रूपमा स्वीकार्न नसकेको गुनासाे गर्नुभएकाे छ ।
साेमबार बसेकाे राष्ट्रिय सभा बैठकमा राष्ट्रिय सरोकार तथा समन्वय समितिको आर्थिक वर्ष ०७५-७६, ०७६-७७ र ०७७-७८ को वार्षिक प्रतिवेदन कार्यान्वयनको अनुगमन एवं मूल्यांकन प्रतिवेदन, २०७९ माथिको छलफलमा बाेल्दै उहाँले संघीय संसद्का दुवै सदनकाे महत्व बराबर भएकाे बताउनुभयाे । तर सरकारले राष्ट्रिय सभालाई हेपेकाे सांसद् देवकाे भनाइ थियाे ।
०७२ सालकाे संविधानमा संसद्लाई नयाँ ढंगले स्थापित गर्नेगरी काम गरिएकाे उहाँले स्मरण गराउनुभयाे । संसदीय सर्वाेच्चताकाे कुरालाई संविधानमै उल्लेख गरिएकाे भन्दै उहाँले केही कुरा बाहेक संसद्का दुवै सदनकाे उत्तिक्कै महत्व रहेकाे सांसद् देवले बताउनुभयाे ।
उहाँले भन्नुभयाे - 'हिजाेकाे भन्दा आजको सन्दर्भमा केही कुराबाहेक समानन्तर रूपमा प्रतिनिधि सभा र राष्ट्रिय सभाको महत्त्वलाई, गरिमा र अधिकारलाई स्थापित गरेका छौं, तर दुःखको कुरा, मिडिया, बुद्धिजिवि र आम मानिसको कुरा त छोडौं, सरकारले पनि संघीय संसद् भनेको राष्ट्रिय सभा हुँदो रहेछ, राष्ट्रिय सभा पनि संघीय संसदको एउटा पार्ट हो, राष्ट्रिय सभा बिना संघीय संसद् होइन भन्नेकुरा अहिलेसम्म याे अहिलेको सरकार मात्रै होइन, सरकारहरूले याे कुरालाई बुझ्नै खोजिरहेका छैनन् ।'
प्रतिनिधि सभा भन्दा राष्ट्रिय सभाकाे अधिकार, गरिमा, संविधानले दिएकाे मान्यता कमजाेर छ भन्ने ढंगले बुझिएकाे भन्दै सांसद् देवले आपत्ति जनाउनुभयाे । साेही कारण राष्ट्रिय सभाका समितिले दिने निर्देशनलाई सरकारले गम्भीर रुपमा नलिएको बताउँदै उहाँले भन्नुभयाे - 'संसद्को सर्वोच्चताका आधारमा संविधान निर्माण भएका छन्, तर दुःखको कुरा सरकारले संघीय संसद् भनेको राष्ट्रिय सभा हो भन्ने कुरालाई बुझ्न खोजेको छैन, जसका कारण यसको चार समितिको निर्देशनप्रति गम्भीरता देखिँदैन ।'
