काठमाडौं । नेकपा एमालेका सांसद् भीमप्रसाद आचार्यले ५ महिना पुग्दा पनि सरकारले पूर्णता पाउन नसक्नु लाजमर्दो विषय भएकाे बताउनुभएकाे छ ।
मंगदबार बसेकाे प्रतिनिधि सभा बैठककाे विशेष समयमा बाेल्दै सांसद् आचार्यले मन्त्रिपरिषद्लाई पूर्णता दिन नसक्ने सरकारबाट केही अपेक्षा गर्न नसकिने बताउनुभयाे ।
काम नगरी वर्तमान सरकार धेरै अलमलिइरहेको उहाँले बताउनुभयाे । सांसद् आचार्यले भन्नुभयाे - 'यो सरकारले आफ्नो पूर्णता समेत प्राप्त गर्न सकेको छैन, लाजमर्दो अवस्था के हो भने सरकार र यसका अंगहरूले सरकार गठन भएको झण्डै आधी वर्ष भइसक्दा पनि आफ्नो पूर्णता नपाउने, मन्त्रालयहरू खाली हुने, काम नहुने, सेवाग्राहीहरु मर्कामा हुने, विकासका कामहरू अलपत्र पर्ने खालको अवस्था अहिले विद्यमान छ, हामी मन्त्री र प्रधानमन्त्रीक कुरा सुनिरहेका छाैं हामी याे गर्छाैं उ गर्छाैं, प्रधानमन्त्रीजीलाई मेरो प्रश्न, सरकारलाई मेरो प्रश्न, यो गठबन्धनका नेताहरूलाई मेरो प्रश्न के छ भने - तपाईंहरूले यो सरकारलाई पूर्णता कति वर्ष लगाएर गर्नुहुन्छ ? कति वर्ष लाग्छ ?'
विकासका काम गर्न कति समय लाग्छ भन्ने प्रश्न गर्दै उहाँले भन्नुभयाे - 'विकासको माग गर्न यहाँहरूलाई कति समय लाग्छ ? कति दशक लाग्छ कि वर्ष लाग्छ कि? वा शताब्दी लाग्छ ? उत्तर चाहियो ।'
'संसद् भनेकाे सरकार बनाउनकाे लागि प्रधानमन्त्रीलाई भाेट हाल्ने ठाउँ मात्र हाेइन, संसद् भनेकाे सरकारकाे जवाफदेहीता लिने ठाउँ हाे, सरकारले आफ्नाे जवाफदेहीता संसद्प्रति प्रदर्शन गर्न सक्नुपर्छ, आफ्ना कार्ययाेजनाहरु यहाँ प्रष्ट ढंगले अगाडि सार्नुपर्छ, जे मन लाग्याे त्यही गर्ने छुट कसैलाई छैन, आज याे अवस्थाबाट मुलुक गुज्रिरहेकाे छ ।'
प्रधानमन्त्री पुष्पकमल दाहाल प्रचण्डले परिवर्तन उल्टिने खतरा छ भनेकाे सुनेकाे बताउँदै उहाँले प्रश्न गर्नुभयाे - 'याे कसले उल्ट्याउन सक्छ ? जनताले विद्राेह र क्रान्ति गरेर ल्याएकाे परिवर्तन उल्ट्याउने तागत काेसँग छ ? परिवर्तन तब उल्टिन्छ जब यहाँहरु निकम्मा हुनुहुन्छ, जनता भाेकाे छ, नांगाे छ, किसानका मजदूरका समस्या छन्, जनताहरु पीडित छन्, अन्यायमा छन्, उनीहरुका माग सरकारले पूरा गरेन भने व्यवस्था उल्ट्याउने र प्रतिगमन उल्ट्याउने सबैभन्दा पहिलाे कारक याे सरकार बन्छ ।'
जनतालाई गुमराहमा राखेर ६ महिनासम्म सरकारलाई पूर्णता नदिने र प्रदेश सरकारकाे भविष्यमाथि पनि यही सरकारका कारण प्रश्न उठेकाे बताउनुभयाे । आफूले केही गर्न नसक्ने, अनावश्यक फजुल वाचन गरेर हिँड्ने, देश र जनताका केही काम नगर्ने अनि परिवर्तन उल्ट्याउने कुनै अर्काे हाउखुजी खाेजेर हिँड्ने भन्दै उहाँले प्रश्न गर्नुभयाे । देशकाे अर्थतन्त्र संकटमा रहेकाे, महंगी बढेकाे, विकासका काम अलपत्र परेका, बजेट काटिएकाे, सबै क्षेत्र अस्तव्यस्त भएकाे बताउँदै सांसद् आचार्यले प्रश्न गर्नुभयाे - 'सरकारलाई पूर्णता कहिले दिनुहुन्छ ? जनताका काम कहिले गर्नुहुन्छ ? विकासकाे प्राथमिकता के हाे ?'
