काठमाडौं । प्रतिनिधि सभा सदस्य देवेन्द्र पौडेलले देश आर्थिक संकटमा परेको बेला बैंकमा ५५ खर्ब रुपैयाँ जम्मा भएको भन्ने समाचार आएको भन्दै खुसी व्यक्त गर्नुभएको छ ।
मंगलबार प्रतिनिधि सभा बैठकमा बोल्दै पौडेलले सो रकम देशका रुग्ण उद्योगमा लगानी गर्नुपर्ने बताउनुभयो । जसबाट देशमा रोजगारी सिर्जना हुने उहाँको भनाइ छ । ‘५५ खर्ब रकम भनेको नेपाल सरकाले एभरेज तीन पटक प्रस्तुत गर्ने बराबरको बजेट हो’, उहाँले भन्नुभयो ।
प्रतिनिधि सभा बैठकको आकस्मिक समयमा बोल्दै पौडेलले ४० लाख डोज खोप प्रयोगविहीन अवस्थामा रहेको भन्दै सो विषयमा छानबिन गर्न माग गर्नुभयो । दुःखका साथ ल्याएको त्यो खोप प्राविधिक रूपमा लगाउन नमिलेकोले हो वा किन प्रयोग विहीन भएको हो ? भन्दै उहाँले प्रश्न गर्नुभयो ।
सांसद पौडेलले यस वर्ष विद्यार्थीहरूले समयमै पाठ्यपुस्तक पाएका भन्ने समाचार आएको भन्दै खुसी व्यक्त गर्नुभयो । त्यस्तै समाचार स्वास्थ्य क्षेत्रमा पनि सुन्न चाहेको उहाँले बताउनुभयो । ‘हो त्यस्तै गरी हस्पिटलमा इमरजेन्सीमा उपचार गर्न गएको बिरामीले पनि राम्रोसँग उपचार प्राप्त गर्न पाएको कुरा सम्बन्धित निकायबाट अनुगमन गरेर सुन्न पाउँ’, उहाँले भन्नुभयो ।
त्यसै गरी कृषि क्षेत्रको पनि सुखद समाचार सुन्न पाइयोस् भन्ने उहाँले कामना गर्नुभयो । ‘किसानले पनि समयमा नै कृषि प्रक्रिया सुरु गर्नुभन्दा पहिला मल प्राप्त गर्ने र राज्यको तर्फबाट यस प्रकारका अत्यावश्यक बस्तुहरूको व्यवस्था गरेको कुरा खुसी साथ बाहिर आओस्’, उहाँले भन्नुभयो ।
