काठमाडौं । प्रतिनिधि सभा सदस्य योगेश भट्टराईले देशमा ठगी गर्नेलाई कारबाही गर्ने कानुन विद्यमान हुँदाहुँदै सरकारले मिटर ब्याजको नाममा ठगी गर्नेलाई कारबाही नगरेको भन्दै आपत्ति जनाउनु भएको छ ।
बुधबार प्रतिनिधि सभा बैठकमा बोल्दै भट्टराईले संसदमा नै पेस नभएको विधेयक माथि मन्त्रीले सैद्धान्तिक बहस चलाउनु अर्थहीन भएको बताउनुभयो । ‘पहिला विधेयक ल्याउनुस्, त्यस पछि छलफल गर्न उचित हुन्छ’, भट्टराईले भन्नुभयो ।
पूर्व गृह मन्त्री रवि लामिछानेले ल्याउनु भएको राष्ट्रिय परिचयपत्र सम्बन्धी कार्यविधि खारेज गरिएको भनिएको भए पनि उहाँले ल्याएको कार्यविधि के थियो र त्यो किन खारेज गर्नु पर्यो भन्ने सम्बन्धमा कुनै जानकारी नदिइएकोले त्यस विषयमा प्रष्ट जानकारी दिन भट्टराईले माग गर्नुभयो । सो कार्यविधिले देशलाई के हानी गर्ने थियो भन्ने कुरामा प्रतिनिधि सभा प्रष्ट हुनुपर्ने भट्टराईले बताउनुभयो ।
केही दिन अघिदेखि प्रधानमन्त्रीले अराजकता र व्यवस्था विरोधी गतिविधि बढ्यो भनेर अभिव्यक्ति दिइरहेको बताउँदै भट्टराईले प्रधानमन्त्रीले के आधारमा ती कुरा भनेको हो, संसद्लाई जानकारी दिन माग गर्नुभयो । ‘अराजकता र व्यवस्था विरोधी माथि नियन्त्रण गर्ने तपाईँको मन्त्रालय हो, अराजकता र व्यवस्था विरोधी को हुन् र प्रधानमन्त्रीले कुन सूचनाको आधारमा भन्नुभएको हो ?’ भट्टराईले प्रश्न गर्नुभयो ।
