काठमाडौं । प्रतिनिधि सभा सदस्य राजेन्द्र लिङदेनले राज्यका उच्च अधिकारीको स्वास्थ्योपचारका विषयमा नीति नै बाउन आवश्यक रहेको बताउनुभएको छ ।
शुक्रबार प्रतिनिधि सभाको बैठकमा बोल्दै लिङदेनले राष्ट्रपति रामचन्द्र पौडेललाई विदेशमा उपचारको लागि पठाउँदा राज्य कोषका ठुलो रकम खर्च भएको बताउनुभयो । यस्तो कामले राज्य कोषको दुरुपयोग भएको लिङदेनले बताउनुभयो ।
देश गम्भीर आर्थिक संकटमा फसेको बेला राष्ट्रपतिको उपचार यात्रा अस्वाभाविक र महँगो भएको उहाँले बताउनुभयो । ‘राजश्वले चालु खर्च समेत धान्न सकेको छैन, यस्तो बेला अस्वाभाविक ढंगको महँगो राष्ट्रपतिको उपचार यात्रा र अयोग्य लडाकुलाई जुन ढंगको रकम दिन खोजिँदै छ, सत्ता दुरुपयोगको यो चरम नमुना हो’, उहाँले भन्नुभयो ।
लिङदेनले अयोग्य लडाकुलाई पैसा होइन स्वास्थ्य उपचारमा सुविधा, सीप र रोजगारी दिन दिनु पर्ने बताउनुभयो ।
आफू बिरामी पर्दा एक रुपैँया पनि उपचार खर्च नलिएको उहाँले बताउनुभयो । द्वन्द्वको बेला सबैभन्दा बढी सम्पत्ति क्षति हुने मानिस मध्ये आफू पनि परे पनि राज्यबाट कुनै सुविधा नलिएको उहाँले जानकारी दिनुभयो । अब पनि राज्यबाट स्वास्थ्य उपचारको नाममा कुनै सुविधा नलिने उहाँले प्रतिबद्धता व्यक्त गर्नुभयो ।
