काठमाडौं । प्रतिनिधि सभा सदस्य अर्जुननरसिंह केसीले नक्कली भुटानी शरणार्थी प्रकरणमा नेपालको नै बदनाम भएको बताउनुभएको छ ।
सोमबार प्रतिनिधि सभा बैठकको शून्य समयमा बोल्दै केसीले सो घटनाले राष्ट्रलाई लज्जित बनाउने काम गरेको बताउनुभयो । जो जहाँ जुनसुकै पदमा भए पनि कारबाहीको दायरामा ल्याउनु पर्नेमा जोड दिनुभयो ।
धेरै देशमा राष्ट्रप्रमुखहरू समेत अपराधका घटनामा कारबाहीको दायरामा आएको उदाहरण प्रस्तुत गर्दै उहाँले पदको आधारमा कसैलाई अपराधबाट जोगाउने कुरा हुन नसक्ने बताउनुभयो ।
सो घटनामा छानबिन प्रक्रियामा रहेका पक्षको समेत संलग्न भएको भन्ने कुरा उठेकाले घटनाको निष्पक्ष छानबिन गर्न उहाँले माग गर्नुभयो । जसको लागि अधिकार सम्पन्न आयोग गठन गर्नुपर्ने केसीको सुझाव छ । ‘भूतपूर्व प्रधानन्यायाधीशको संयोजकत्वमा निष्पक्ष, पारदर्शी, स्वतन्त्र र सर्वाधिकार सम्पन्न आयोग गठन गरेर यसलाई निश्चित टुङ्गोमा पुर्याऊँ’, उहाँले भन्नुभयो ।
