काठमाडौं । प्रतिनिधि सभा सदस्य ठाकुर गैरेले नेपाली नागरिकलाई भुटानी शरणार्थी बनाएर विदेशमा पठाउने र त्यस बापत करोडौँ असुल्ने कुरा जघन्य अपराध भएको बताउनुभएको छ ।
मंगलबार प्रतिनिधि सभा बैठकको शून्य समयमा बोल्दै गैरेले सो काम राष्ट्रघाती र देशद्रोही भएको बताउनुभयो । त्यस्ता मानिसलाई छिटोभन्दा छिटो कारबाहीको दायरामा ल्याउनु पर्ने गैरेले बताउनुभयो ।
सो घटनामा केही व्यक्ति पक्राउ परेका तथा केही प्रतिनिधि सभा सदस्यलाई वारेन्ट जारी गरेको कारण भागिरहेको सुनिन आएको उहाँले बताउनुभयो । ‘केही सांसद् जो नोटिसमा हुनुहुन्छ, उहाँ सदनमै हुनुहुन्छ, सदनमा नै बोलिरहनुभएको छ, यो के भएको हो’, उहाँले भन्नुभयो ।
यस विषयमा छानबिन के भइरहेको छ र सरकारले के गरिरहेको छ भन्ने विषयमा सरकारले सदनलाई जानकारी दिनुपर्ने उहाँले बताउनुभयो ।
