काठमाडौं । प्रतिनिधि सभा सदस्य डा. तोसिमा कार्कीले प्रतिनिधि सभा देश निर्माणको छलफल गर्ने थलो हो कि एक भ्रष्टाचारीले अर्को भ्रष्टाचारीलाई जोगाउने प्रहसन गर्ने थलो हो ? भन्दै प्रश्न गर्नुभएको छ ।
मंगलबार प्रतिनिधि सभा बैठकको शून्य समयमा बोल्दै कार्कीले नेपाली नागरिकलाई नक्कली भुटानी शरणार्थी बनाएर विदेश पठाएर ठगी गरेका काण्डमा ठुला ठुला मानिस र राजनेताको नाम जोडिएको उहाँले बताउनुभयो । प्रहरीले पक्राउ पुर्जी जारी गर्दा समेत जोगाउने प्रयत्न भएको भन्दै उहाँले आलोचना गर्नुभयो । ‘एकले अर्कालाई जोगाई रहेन, काण्डै काण्ड गरिरहने, अनि यो देश डुबाई रहने ?
नक्कली शरणार्थी प्रकरणले देशको बदनाम भएको उहाँले बताउनुभयो । नेपाल भ्रष्टाचारी र दलालीको अखडा भएको सन्देश अन्तर्राष्ट्रिय जनगतमा गएको भन्दै उहाँले चिन्ता व्यक्त गर्नुभयो । यस्तो अवस्थामा अन्तर्राष्ट्रिय जनगतमा के मुख देखाएर अनुदान माग्न जाने ? भन्दै उहाँले प्रश्न गर्नुभयो ।
टेप काण्डको छानबिन गर्न माग गर्दा सांसद् आर्जु देउवाले महिला माथि हिंसा भयो भनेको प्रति पनि उहाँले आलोचना गर्नुभयो । भ्रष्टाचारको कुनै लिंग नहुने उहाँले बताउनुभयो । ‘भ्रष्टाचार मात्र होइन, यहाँ चिनारी फेरेर राष्ट्रघात भएको छ, अपराध भएको छ, कारबाही हुनुपर्छ’, उहाँले भन्नुभयो ।
सम्पत्ति सार्वजनिक गर्ने कुरा उठेको भन्दै सबैको सम्पत्ति सार्वजनिक र आम्दानीको स्रोत समेत खुलाएर वेव साइडमा राख्न उहाँले आग्रह गर्नुभयो ।
