काठमाडौं । नेपाली कांग्रेसका महामन्त्री तथा सांसद् विश्वप्रकाश शर्माले भ्रष्टाचारविरुद्ध फाइल नभएर फायर खोल्नुपर्ने बताउनुभएकाे छ ।
मंगलबार बसेकाे प्रतिनिधि सभाको बैठकमा विनियोजन विधेयक, २०८० का सिद्धान्त र प्राथमिकता (प्रि-बजेट) माथिकाे छलफलमा बाेल्दै सांसद् शर्माले भुटानी शरणार्थी प्रकरणकाे फाइललाई निष्कर्षमा पुर्याउनुपर्ने बताउनुभयाे ।
'भुटानी शरणार्थीकाे फाइल खाेलिएकाे छ, यसलाई निष्कर्षमा पुर्याउनुपर्छ, भ्रष्टाचारका विरुद्ध फाइल मात्रै होइन, फायर खोल्नुपर्छ राज्यले, निर्दोष कोही फस्नुहुन्न, दोषी बँच्नुहुन्न'- उहाँले भन्नुभयाे ।
शून्य सहनशिलताकाे नीति ल्याउने र अर्काेतिर सरकारले ल्याएकाे भ्रष्टाचार निवारण एेन, २०५९ काे संशाेधनमा भने भ्रष्टाचारकाे छानबिन गर्न ५ वर्षे हदम्याद राखिनु विराेधाभासपूर्ण रहेकाे सांसद् शर्माले बताउनुभयाे ।
भ्रष्टाचारकाे छानबिनका लागि कुनै विकल्प नराखिकन राज्य कठाेरतापूर्वक जानुपर्ने उहाँले बताउनुभयाे । 'कुनै पनि हदम्याद राख्ने कुराबाट सरकार पछि सर्नुपर्छ, याे राख्ने कुरामा सहमति हुन सकिँदैन'- शर्माले भन्नुभयाे ।
