काठमाडाैं । नेकपा माओवादी केन्द्रका सांसद् महेन्द्र बहादुर शाहीले बजेटका सिद्धान्त र प्राथमिकता पूर्ण नभएकाे बताउनुभएकाे छ ।
मंगलबार बसेकाे प्रतिनिधि सभाको बैठकमा विनियोजन विधेयक, २०८० का सिद्धान्त र प्राथमिकता (प्रि-बजेट) माथिकाे छलफलमा बाेल्दै सांसद् शाहीले बजेटका सिद्धान्त र प्राथमिकतामा अपूर्ण रहेकाे र त्यसमा खासै नयाँ कुरा नसमेटिएकाे बताउनुभयाे । सदनमा व्यापक छलफल गरेर यसलाई पूर्ण बनाउनुपर्ने उहाँकाे भनाइ छ ।
विश्वमै आर्थिक मन्दी देखिएकाे र यसकाे असर नेपालकाे अर्थतन्त्रमा परेकाे भन्दै सांसद् शाहीले बताउनुभयाे । देशकाे अर्थतन्त्र संकटमा रहेकाे भन्दै उहाँले राष्ट्रिय तथ्यांक कार्यालयकाे प्रतिवेदनले समेत देशकाे अर्थतन्त्रकाे चित्र देखाइदिएकाे बताउनुभयाे ।
विगतका कामकाे समीक्षा गर्दै अगाडि बढ्नुपर्ने भन्दै उहाँले प्रतिफल नदिने क्षेत्रमा लगानी गर्न नहुने बताउनुभयाे । अहिलेसम्म उत्पादन भन्दा अनुत्पादक क्षेत्रमा लगानी भइरहेकाे भन्दै सांसद् शाहीले अब उत्पादन हुने क्षेत्रमा लगानी गर्नुपर्ने बताउनुभयाे ।
देशकाे अर्थतन्त्र सुधार गर्नका लागि फजुल खर्च कटौती गर्नुपर्ने र अनावश्यक भाैतिक संरचना निर्माण राेक्नुपर्ने उहाँकाे सुझाव छ । फजुल खर्च नियन्त्रणमा ल्याउनुपर्ने भन्दै सांसद् शाहीले आवश्यक भएकाे ठाउँमा मात्र पुँजीगत क्षेत्र बढाउनुपर्ने बताउनुभयाे ।
नेपालका लगानीका क्षेत्र धेरै भएकाे भन्दै सांसद् शाहीले लगानीका क्षेत्र हेरेर लगानी गर्ने हाे भने त्यसबाट देशलाई समृद्ध बनाउन सकिने बताउनुभयाे । नेपालकाे पानी र जवानी (युवाहरु)मा लगानी गर्ने हाे भने देशकाे समृद्धि सम्भव हुने समेत उहाँले बताउनुभयाे । 'अबकाे युद्ध भनेकाे पानीकाे युद्ध हाे हामी हाम्राे जलस्राेतमा लगानी गरेर प्रतिफल लिन सक्छाैं, नेपालकाे पानी र जवानीमा लगानी गर्याैं भने याे देशकाे समृद्धि सम्भव छ'- शाहीले भन्नुभयाे ।
युरेनियम, फलाम, सुन लगायत खानी नेपालमै रहेकाले ती खानी उत्खनन् गरेर, पर्यटन क्षेत्रमा लगानी गरेर देशलाई समृद्ध बनाउन सकिने भन्दै उहाँले यसमा सरकारकाे ध्यानाकर्षण गराउनुभयाे ।
