काठमाडौं । प्रतिनिधि सभा सदस्य योगेश भट्टराईले केही समय यता राज्य संयन्त्र नै संगठित अपराधमा संलग्न हुन लागेको बताउनुभएको छ ।
मंगलबार प्रतिनिधि सभा बैठकमा बोल्दै भट्टराईले राज्य संयन्त्र नै यसमा संलग्न हुनु चिन्ताजनक विषय भएको बताउनुभयो । ‘गृह मन्त्रालय र त्यसको नेतृत्व नै मानव बेचबिखन जस्तो घातक काममा लाग्नु चिन्ताको विषय हो’, उहाँले भन्नुभयो ।
अपराधमा संलग्न मानिसलाई कुनै पनि पार्टीको नाममा संरक्षण गर्न नमिल्ने उहाँले बताउनुभयो । कुनै राजनीति, जाति वा क्षेत्र विशेष नबनाई त्यस्ता घटनामा संलग्नलाई कारबाहीको दायरामा ल्याउनु पर्ने उहाँले बताउनुभयो । अपराधको गम्भीरयतालाई ध्यान राखी त्यसको निष्पक्ष छानबिन गर्न उहाँले माग गर्नुभयो । अपराधीलाई कुनै पनि बहानामा उन्मुक्ति नदिन उहाँले पार्टीको तर्फबाट माग गर्नुभयो । ‘यस्ता अपराधको कुनै पार्टी हुँदैन, कुनै जात हुँदैन, कुनै धर्म हुँदैन, कुनै राष्ट्रियता हुँदैन, कुनै क्षेत्र हुँदैन’, उहाँले भन्नुभयो ।
भट्टराईले वर्तमान सत्ता गठबन्धनको जोडी नफुटेसम्म देशको अर्थतन्त्र चलायमान बन्न नसक्ने बताउनुभयो । प्रधानमन्त्री पुष्पकमल दाहाल प्रचण्डले अहिलेकै जोडी बनाइरहने हो भने उहाँले देखाउने भनेको फिल्म फिल्म सुपर फ्लप हुने उहाँले बताउनुभयो ।
अहिले सरकार माथि चौतर्फी अविश्वास सिर्जना भएकोले अब उहाँको फिल्म नचल्ने भट्टराईले दाबी गर्नुभयो । सरकार, सरकारका संयन्त्र, कर्मचारीतन्त्र केही पनि नचलेको उहाँले प्रष्ट पार्नुभयो । ‘कर्मचारीले विश्वास गरेका छैनन्, विदेशीले विश्वास गरेका छैनन्, लगानीकर्ताले विश्वास गरेका छैनन्, अब यो जोडी कायम राख्ने की जोडी बदल्ने की छोड्ने, यो ठाउँमा छलफल गर्नुपर्छ, यही, जोडी कायम राख्ने हो भने प्रधानमन्त्रीको फिल्म सुपर फ्लप हुने निश्चित छ’, उहाँले भन्नुभयो ।
सरकार माथि चौतर्फी अविश्वास बढेको उहाँले बताउनुभयो । अब नेपालको राजनीति सामान्य झारफुक वा सामान्य सर्जरी गरेर नहुने उहाँले प्रष्ट पार्नुभयो । ‘सर्जरी त गर्ने हो, तर उपकरण ठिक छैन, डाक्टर ठिक छैनन्, डाक्टर बदल्ने की उपकरण बदल्ने की, त्यही काम नलाग्ने उपकरण र काम नलाग्ने डाक्टरलाई सर्जरी गर्न लगाउने ?’, उहाँले भन्नुभयो ।
