काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देलले नक्कली भुटानी शरणार्थी प्रकरणले देशकै बेइज्जत भएकाे बताउनुभएकाे छ ।
बुधबार प्रतिनिधि सभा बैठक सुरु भएलगत्तै सभामुख देवराज घिमिरेसँग समय मागेर बाेल्दै अध्यक्ष लिङ्देन नक्कली शरणार्थी प्रकरण जस्ता जघन्य अपराधले देशको बेइज्जती मात्र नभएर दुनियाँसामु देशको शिर झुकेकाे बताउनुभयाे ।
दुनियाँसामु देशको शिर झुकाउने खालको क्रियाकलापमा पूर्व गृहमन्त्रीहरु र उपप्रधानमन्त्री भएका जस्ता मानिसकाे नाम आउनु लज्जाकाे विषय भएकाे उहाँले बताउनुभयाे ।
नक्कली भुटानी शरणार्थी प्रकरणमा अहिलेसम्म भइरहेकाे छानबिन र कारबाहीकाे प्रगतिबारे सदनलाई जानकारी दिन अध्यक्ष लिङ्देनले सरकारसँग माग गर्नुभयाे । यस विषयमा सभामुख घिमिरेसमक्ष सरकारलाई रुलिङ गर्न पनि उहाँले माग गर्नुभयाे ।
अनुसन्धानलाई आशंकका दृष्टिकाेणले हेरिएकाे अवस्था रहेकाे बताउँदै अध्यक्ष लिङ्देनले भन्नुभयाे - 'यस प्रकरणमा शीर्ष नेता वा सरकारको गलत मनसाय छैन भन्ने कुरा प्रष्ट पार्नका लागि सरकारले के गरीराखेकाे छ ? कारबाहीको प्रगति कहाँ पुगेको छ ? के हुँदैछ भन्ने कुरा सदनलाई जानकारी गराइयाेस भन्ने हाम्राे माग छ ।'
भर्खर पूर्वगृहमन्त्री पक्राउ परेकाे समाचार आएकाे र बाहिर अनेक कुरा आइरहेका भन्दै उहाँले यसमा भइरहेकाे छानबिन र कारबाहीकाे प्रगतिबारे जानकारी गराउन पनि माग गर्नुभयाे ।
राज्यविरुद्धको संगठित अपराध जस्ताे प्रकरणमा जाेडिएका जाे भएपनि उम्कन दिन नहुने भन्दै अध्यक्ष लिङ्देनले प्रहरीले अनुसन्धान गर्ने हो कि ? अख्तियारलाई बुझाउने हो कि ? भन्ने तर्कहरु आउन थालेकाे बताउनुभयाे । 'अहिले नक्कली भुटानी शरणार्थीको नाममा जुन काण्ड भइरहेको छ, त्यो केवल आर्थिक भ्रष्टाचार वा अंकसँग मात्रै सम्बन्धित होइन, त्यो ठगी राज्यविरुद्धको संगठित अपराध हो, यो कीर्तेसम्बन्धी एक प्रकारको जघन्य अपराध हो, यसमा संलग्न कुनै पनि मानिसलाई विभिन्न बहानामा उम्नुक्ति दिनु हुँदैन'- उहाँले भन्नुभयाे ।
