काठमाडाैं । प्रतिनिधि सभाको कार्यव्यवस्था परामर्श समितिको बैठकमा तीन दिनभित्र विषयगत समितिको बैठक थाल्ने सहमति भएको छ ।
आइतबार बसेको कार्यव्यवस्था परामर्श समितिको बैठकमा साे सहमति भएकाे हाे । बैठकमा संयुक्त समिति (संसदीय सुनुवाइ, राज्यका निर्देशक) गठन गर्ने, नीति तथा कार्यक्रम संयुक्त सभामा पेस गर्ने तयारी तथा पोशाक र प्रतीक चिन्हको प्रयोग सम्बन्धमा पनि छलफल भएकाे छ ।
बैठकमा जेठ ४ गते प्रधानमन्त्री पुष्पकमल दाहाल प्रचण्डसँग प्रतिनिधि सभामा हुने प्रश्नोत्तर कार्यक्रम प्रभावकारी बनाउने सहमति भएकाे छ ।
कार्यव्यवस्था परामर्श समितिको आजको बैठकमा सांसद्हरुले बजेट निर्माण गर्दा मन्त्रीहरुले आफूहरुसँग छलफल नगरेको भन्दै गुनासो गरेका थिए ।
बैठकमा सभामुख देवराज घिमिरले सदनमा उठेका विषयमा सरकारले गम्भीरतापूर्वक ध्यान दिनुपर्ने बताउनुभएकाे थियाे । उहाँले बजेट निर्माण गर्दा सांसद्हरुसँग छलफल नभएको गुनासोको सम्बोधन हुन जरुरी रहेको बताउनुभएकाे सभामुखकाे सचिवालयले जनाएकाे छ ।
