काठमाडौं । नेकपा एमालेका सांसद् रघुजी पन्तले भारतको दबाबमुलक कूटनीतिमा नेपाल पर्न नुहुने भन्दै सरकारको ध्यानाकर्षण गराउनुभएकाे छ ।
सोमबार बसेकाे प्रतिनिधि सभा बैठकमा बोल्दै सांसद् पन्तले प्रधानमन्त्री पुष्पकमल दाहाल प्रचण्ड र नेपाल सरकारलाई भारतको सो कूटनीतिको दबाबमा नपर्न सचेत गराउनुभयाे ।
प्रधानमन्त्रीलाई राेकेर भारतले पूर्वराजा ज्ञानेन्द्र शाहलाई स्वागत गर्नु शंकास्पद भएकाे उहाँले बताउनुभयाे । सांसद् पन्तले भन्नुभयाे - 'हाम्राे प्रधानमन्त्री भारत जान्छु-जान्छु भन्नुहुन्छ, भारत भ्रमण सरेकाे सर्यै छ, तर नेपालकाे प्रधानमन्त्रीलाई भारतमा जान नदिएर पूर्वराजालाई चाहिँ उत्तर प्रदेशमा स्वागत गर्ने, स्वागत गर्ने सन्दर्भमा त्यहाँका मुख्यमन्त्री मन्त्री र नेताले बाेलेका छन् त्याे अत्यन्त आपत्तिजनक छ, यही हाे खेल ।'
आफ्नो एजेण्डामा सहमत गराउन भारतले प्रधानमन्त्री प्रचण्डको भ्रमण पछि सार्दै लगेको समेत उहाँले बताउनुभयाे । सांसद् पन्तले भन्नुभयाे - 'भारतमा नेपालको प्रधानमन्त्रीलाई जान नदिने, तर नेपाली जनताले हटाएको राजालाई प्रधानमन्त्रीको सट्टा स्वागत गर्ने र प्रेसर डिप्लोमेसी, यो वल्ड डिप्लोमेसीमा चलनचल्तीको शब्द हो दबाबको कूटनीति, के एजेण्डा मेरो पूरा गर्छौ ? मेरो एजेण्डा तिम्रो कार्यसूचीमा पर्छ कि पर्दैन ? अनि मात्रै भारतमा म तिमीलाई स्वागत गर्छु भनेर त्यसका लागि दबाब दिन पूर्व राजालाई भारतमा स्वागत गरियो ।'
इतिहासमा कहिल्यै पनि पराधिन नभएको नेपाल र त्यस देशका प्रधानमन्त्रीको भारत भ्रमणको कार्यसूचीमा देशको शीर निहुँर्याउने, देशलाई अप्ठ्यारोमा पार्ने, नेपालको स्वाभिमान गिराउने कुनै पनि एजेण्डा नराख्न र प्रेसर कूटनीतिमा नपर्न उहाँले प्रधानमन्त्रीकाे ध्यानाकर्षण गराउनुभयाे । 'म प्रधानमन्त्रीलाई आग्रह गर्न चाहन्छु - यो प्रेसर डिप्लोमेसीमा नेपालको सरकार पर्नुहुँदैन, नेपालको प्रधानमन्त्री पर्नुहुँदैन, हाम्रा पुर्खाले यो मुलुक म गर्वका साथ भन्छु-३५ सय वर्ष इतिहास भएको यो मुलुक आजसम्म कहिल्यै पराधिन भएको छैन, आजको भारत त ब्रिटिसले एकीकरण गरिदिएको सन् १९४७ पछि बनेको भारत हो, तर पृथ्वीनारायण शाहले एकीकरण गरेको यो मुलुक, त्यो भन्दा अगाडि मल्लहरुले एकीकरण गरेको यो मुलुक, त्यो भन्दा अगाडि लिच्छवीहरुले एकीकरण गरेको यो मुलुक आजसम्म स्वतन्त्र छ'- सांसद् पन्तले भन्नुभयाे ।
नेपालको असंलग्न परराष्ट्र नीतिले आफ्नो सन्तुलन गुमाउन थालेको भन्दै उहाँले चिन्ता व्यक्त गर्नुभयाे । सांसद् पन्तले भन्नुभयाे - 'देशको स्वाभिमान, देशको आर्थिक आत्मनिर्भरता र आर्थिक स्वतन्त्रता त्यसलाई ध्यानमा राखेर, मुलुकको स्वाभिमानलाई राखेर, देशको सार्वभौमसत्ता र भौगोलिक अखण्डतालाई ध्यानमा राखेर लिपुलेक, कालापानी र लिम्पियाधुरा फिर्ता गर्ने कुरालाई ध्यानमा राखेर, हाम्रो सीमा सुरक्षालाई ध्यानमा राखेर, हाम्रो आर्थिक स्वाभिमानलाई ध्यानमा राखेर प्रधानमन्त्रीको भारत भ्रमण सफल होस् ।'
देशकाे स्वाभिमानलाई ध्यानमा राखेर मात्र काम गर्न उहाँले प्रधानमन्त्री प्रचण्डकाे ध्यानाकर्षण गराउनुभयाे । सांसद् पन्तले भारत भ्रमणमा डिजिटल भुक्तानी प्रणाली भारतीय कम्पनीलाई दिन लागिएकाे खबर आएकाे भन्दै आपत्ति जनाउनुभयाे । उहाँले भन्नुभयाे - 'नेपाली वित्तीय गोपनीयता विदेशीलाई सुम्पिन लागिएको छ, नेपाल राष्ट्र बैंक तथा वाणिज्य बैंकहरुले बनाएको डिजिटल भुक्तानी प्रणाली प्रधानमन्त्रीको भ्रमणको समयमा एजेण्डा बनोस् भनिएको छ, दु:खको कुरा भारतीय दूतावासको दबाबमा राष्ट्र बैंक संलग्न कम्पनीलाई नदिएर भारतीय कम्पनी जेएसआईलाई ठेक्का दिने प्रस्ताव सरकारले भारत भ्रमणको क्रममा लैजाँदै छ ।'
