काठमाडौं । प्रतिनिधि सभामा नेकपा एमाले संसदीय दलका उपनेता सुवास नेम्बाङले शान्ति प्रक्रियाको बाँकी काम टुङ्ग्याउँदा पीडितको भावना सम्मान गर्नुपर्ने बताउनुभएको छ ।
टीआरसी बनाउँदा पीडितको भावनालाई समेटेर कानुन बनाउनु पर्ने नेम्बाङ सुझाव छ । अदालतको विगतको नजिर हेरेर पीडितको भावना सम्बोधन गर्ने गरी सबै दल एक ठाउँमा आएर कानुन बनाउनु पर्नेमा उहाँले जोड दिनुभयो ।
मंगलबार कानुन, न्याय तथा मानव अधिकार समितिको बैठकमा बोल्दै नेम्बाङले छलफल र सहकार्यका माध्यबाट कानुन छिटो बनाएर सङ्क्रमणकालीन न्यायको काम टुङ्ग्याउनु पर्ने बताउनुभयो । कानुन बनाउँदा पीडित केन्द्रित भएर बनाउनु पर्नेमा उहाँले जोड दिनुभयो ।
नेम्बाङले नेपालको अन्तराष्ट्रिय प्रतिबद्धता र प्राकृतिक न्यायको सिद्धान्तलाई हेरेर विधेयकलाई टुङ्गोमा पुर्याउनु पर्ने बताउनुभयो । ‘ अन्तर्राष्ट्रिय हाम्रा प्रतिबद्धताहरू छन्, सर्वोच्च अदालतका फैसलाहरू छन् र कमसेकम पनि पीडितहरूको धेरै पीडितहरूका आफ्ना कुराहरू छन्, ती सबै कुराहरूलाई समेटेर हामीले छलफल गर्दै संशोधन प्रक्रियामा भाग लिएर संशोधन गरेर यहाँसम्म आइपुगेका छौँ’, उहाँले भन्नुभयो ।
सबै प्रक्रिया पुरा गरेर शान्ति प्रक्रियालाई पुरा गर्न सबै राजनीतिक दल एक ठाउँमा उभिनु राम्रो कुरा भएको उहाँले टिप्पणी गर्नुभयो । जसरी हुन्छ प्रभाकारी ढङ्गले शान्ति प्रक्रियाका बाँकी काम टुङ्ग्याउनुपर्ने उहाँले बताउनुभयो ।
