काठमाडौं । प्रधानमन्त्री पुष्पकमल दाहाल प्रचण्डले पूर्व माओवादी लडाकुलाई राज्यकाेषबाट दिएको रकममा भ्रष्टाचार भएको भन्ने कुरा आरोपका लागि आरोप मात्र भएको बताउनुभएको छ ।
बिहीबार प्रतिनिधि सभा बैठकमा सांसदहरुले उठाउनुभएको प्रश्नको जवाफ दिँदै प्रधानमन्त्री दाहालले त्यति बेला क्यान्टोनमेन्टमा बस्ने पूर्वलडाकुको शिविर स्थापना र उनीहरूको रासनका लागि दिएको रकमको सबै हिसाब किताब र त्यो कहाँ खर्च भयो, कस–कसले लिए भन्ने सबै हिसाब रहेको दाहालले बताउनुभयो । गिरिजाप्रसाद कोइराला प्रधानमन्त्री र डा.रामशरण महत अर्थमन्त्री भएको बेला उहाँहरू समेतले रुजु गरेपछि सो रकम दिइएको दाहालले बताउनुभयो । ‘यसलाई अहिले राजनीतिक आग्रह र पूर्वाग्रहका साथ उठाउने गर्दा म आफैँ आश्चर्यमा पर्दछु’, उहाँले भन्नुभयो ।
क्यान्टोन्टमेन्टको कुरा पुरै कपोलकल्पित भएको प्रचण्डले बताउनुभयो । ‘कसैले दिएको उजुरीकै आधारमा छानबिन गरेर दोषी ठहरिए म आफैँ जेल जान तयार रहेको कुरा जानकारी गराउन चाहन्छु’, प्रचण्डले भन्नुभयो ।
देशलाई शान्तिको नयाँ युगमा ल्याउन मद्दत गरेको सो घटनालाई बदनाम नगर्न उहाँले आग्रह गर्नुभयो । अडिट गरेर टुङ्ग्याइसकेको विषयलाई फेरी राजनीतिक पूर्वाग्रह राखी चर्चामा ल्याइएको भन्दै उहाँले आपत्ति जनाउनु भयो । त्यसमा यदि त्यस्तो छ भने २०४६ पछिका सबै राजनीतिक व्यक्ति र उच्चपदस्थ अधिकारीको सम्पत्ति छानबिन गर्न आफू तयार रहेको उहाँले बताउनुभयो । ‘सहमति गरेर जाँदा सबै कुराको छानबिन गर्न सकिन्छ’, उहाँले भन्नुभयो ।
