काठमाडौं । प्रधानमन्त्री पुष्पकमल दाहाल प्रचण्डले विगतमा भएका सबै खालका बीभत्स हत्या काण्डको घटनाको राजनीतिक सहमति गरेर नयाँ ढङ्गले छानबिन गर्नुपर्ने बताउनुभएको छ ।
बिहीबार प्रतिनिधिसभा बैठकमा सांसद प्रभु साहले रौतहट हत्या काण्डको छानबिन हुन्छ कि हुँदैन भनि राख्नु भएको प्रश्नको जवाफ दिँदै उनले रौतहट लगायत विगतका हत्याकाण्डको नयाँ शिराबाट छानबिन गर्नुपर्ने बताउनुभयो ।
उहाँले गौर हत्या काण्डसँगै दरबार हत्याकाण्ड, मदन भण्डारी र जीवराज आश्रितको हत्या लगायतका घटनाको छानबिन गर्नुपर्छ भन्ने पक्षमा आफू आफ्नो पार्टी रहेको बताउनुभयो । यसको लागि सबै राजनीतिक दलको सहमति भने आवश्यक रहेको उहाँको भनाइ छ । ‘गौर हत्याकाण्डलगायतका बीभत्स र भयानक हत्याकाण्डको नयाँ शिराबाट छानबिन हुनुपर्छ भन्ने पक्षमा छु, दरबार हत्याकाण्डको नयाँ शिराबाट छानबिन हुनुपर्छ, अहिले ती कुरालाई बिर्साउने कोसिसलाई गम्भीर रूपमा लिनुपर्छ,मदन आश्रितको दुर्घटनाबारेमा पनि नयाँ शिराबाट छानबिन हुनुपर्छ’, दाहालले भन्नुभयो ।
